БАМ — ХХ үйэ саамай далааһыннаах бырайыактарыттан биирдэстэрэ

50 сыл анараа өттүгэр Бүтүн Сойуустааҕы ыччат хамсааһына — БАМ тутуута саҕаламмыта.

От ыйын 4 күнүгэр Дьокуускайга Ю. А. Гагарин аатынан Култуура уонна аныгы искусство киинигэр Байкал-Амур магистралын тутуу саҕаламмыта 50 сылыгар аналлаах үөрүүлээх тэрээһин буолла.

Тэрээһин бочуоттаах ыалдьыттарынан «Саха сирин комсомолеһа» уонна «Саха сирин ыччата» этэрээттэр бэтэрээннэрэ, ону тэҥэ тырааныспар тутуутун тэрилтэлэрин бэтэрээннэрэ, «Саха сирин тимир суоллара» АК бэрэстэбиитэллэрэ буоллулар.
СӨ Бырабыыталыстыбатын вице-премьерэ Д. Д. Садовников эҕэрдэ тылы этэригэр,тимир суолунан быйыл өрөспүүбүлүкэҕэ 42 мөл. туонна таһаҕас таһыллыбытын, кэлиҥҥи кэмҥэ таһаҕас таһыыта үс төгүл улааппытын бэлиэтээтэ. Итиэннэ билиҥҥи көлүөнэ бу суолу салгыы Магадаҥҥа илдьэригэр баҕатын тиэртэ. Салгыы БАМ суолун туппут бэтэрээннэргэ, «Саха сирин тимир суоллара» АК үлэһиттэригэр Ил Дархан, СӨ Бырабыыталыстыбатын наҕараадаларын, «БАМ 50 сыла» үбүлүөйдээх мэтээллэри туттарда.

«Саха сирин тимир суоллара» АК бастакы дириэктэрэ Дмитрий Трофимов аччыгый БАМ тутуутугар бастакы күнтэн сылдьыбытын кэпсээтэ. «Билигин өрөспүүбүлүкэ алмаас хостооһунугар 1 миэстэлээх, кыһыл көмүскэ иккис, таас чоххо үһүс миэстэлээх. Маннык үлэһит дьон өрөспүүбүлүкэҕэ олороллор. Күннэтэ Аллараа Бэстээххэ 160 туонна таһаҕас сүөкэнэр, норуот хаһаайыстыбатын наадалаах мала өрөспүүбүлүкэҕэ киирэр»,- диэн киэн тутта бэлиэтээтэ.
БАМ бэтэрээннэрин, тимир суол үлэһиттэрин «Пламя» ансаамбыл кэнсиэринэн эҕэрдэлээтэ.