«Барҕарыы» пуонда үбүлээһинэн Дьокуускайга саҥа эбийиэк оҥоһулунна

«Үлэ киһини киэргэтэр» арт-эбийиэк “Барҕарыы” пуонда үбүлээһининэн (дириэктэр Ил Түмэн дьокутаата Постников Афанасий Васильевич), Ил Түмэн дьокутаата Федоров Виктор Николаевич өйөбүлүнэн оҥоһулунна. Ону таһынан Тыыл үлэһиттэрин, сэрии оҕолорун тулаһатын аата нуучча, саха тылынан сурулунна.

Арт—эбийиэк ааптара – Неустроева Александра Анатольевна, Арассыыйа худуоһунньуктарын сойууһун чилиэнэ. Толорооччу – Терентьев Роман Петрович, «Сырдык» тэрилтэ салайааччыта. Бу хамаанда саха дорҕооннорунан ҺӨҔҮҤ арт-эбийиэги оҥорбута. Онон Сахабыт сирин киин куоратыгар сахалыы тылынан иккис маннык бырайыак баар буолла.

Арт-эбийиэк Улуу Кыайыы 80 сылыгар, сэрии ыар тыынын ааспыт ытык көлүөнэҕэ, тыыл үлэһиттэригэр, сэрии оҕолоругар уонна кэлэр көлүөнэ ыччакка ананар. Бырайыак сүрүн уратыта – үлэни уруйдуур норуот бэргэн этиилэрэ, өс хоһоонноро икки тылынан сурулуннулар. Онон «Үлэ киһини киэргэтэр» өс хоһоонунан оҥоһуллубут арт-эбийиэк оҕоҕо-ыччакка үлэ үрдүк  суолтатын өйдөтөр, ону таһынан ийэ тылбытыниҥэрэр аналлаах. Бырайыак эскииһин Дьокуускай куорат сүрүн архитекторын Семен Афанасьевич Сергеевы кытта ырытан, сүбэлэһэн, Бэтэрээннэр сэбиэттэригэр эскииһи эрдэттэн көрдөрөн, уопсай сүбэнэн бигэргэтэн оҥордубут. Арт-эбийиэкДьокуускай куорат киинигэр, оҕо-ыччат мустар сиригэр, Тыыл үлэһиттэрин, сэрии оҕолорун тулаһатыгар, анаан турбута – ураты бэлиэ суолталаах.

Бырайыак үөрүүлээх арыллыытыгар Патриотическай иитии сулууспатын салайааччыта, Куорат сүбэтин дьокутаата Владимир Владимирович СЛЕПЦОВ, Дьокуускай куорат салалтатыттан Евдокия Ивановна ЕВСИКОВА, “Барҕарыы” пуонда дириэктэрэ Афанасий Васильевич ПОСТНИКОВ, РФ Хотугулуу-Илиҥҥи норуоттарын тылларын, культураларын институтун дириэктэрэ, “Барҕарыы” пуонда бырабылыанньатын чилиэнэ Гаврил Григорьевич ТОРОТОЕВ, бырайыак ааптара Александра Анатольевна НЕУСТРОЕВА, Роман Петрович ТЕРЕНТЬЕВ, тыыл бэтэрээннэрэ, сэрии оҕолоро, куорат олохтоохторо кытыннылар.

“Барҕарыы” пуонда үлэтин биир сүрүн хайысхата киин куораппыт бэлиэ сирдэригэр оҕоҕо—ыччакка туһаайан төрөөбүт тылынансуругу—бичиги сайыннарар бырайыактары үбүлээһин буолар. Инникитин Дьокуускай куораппытыгар, Саха сирин бары улуустарыгар ийэ тылбыт эйгэтэ кэҥии, сайда-тупса турарыгар баҕарабыт.