Бары хайысхаҕа хаачыстыба уонна эппиэтинэс баар буолуохтааҕа ирдэннэ

Суруналыыстар байыаннай дьайыыттан саҕалаан Ил Дархан Тымныы Оҕонньору хас сааһыгар диэри кэтэспитин ыйыттылар.

Айсен Николаев олох бары хайысхатыгар хаачыстыба уонна эппиэтинэс баар буолуохтааҕын ирдээтэ, ити үөрэхтээһиҥҥэ, доруобуйа харысхалыгар, тутууга, суолга, муниципалитеттар, о.д.а.үлэлэригэр диэн тоһоҕолоон этилиннэ. Үөһэттэн этиллэрин кэтэһэн олорбокко, бэйэҥ тустаах эппиэккэр баар учаастагы көрүөхтээҕиҥ ирдэннэ.

Бырамыысыланнаска элбэх ыйытыы киирдэ, хоту аһыллыахтаах атомнай ыстаансыйаҕа каадырдар бааллар дуо диэн ыйытыыга МФТИ уонна ХИФУ үлэһиттэри бэлэмнии сылдьаллара этилиннэ. Эһиил Ленскэйгэ уонна Нерюнгрига гаас тардыллыа, Алдаҥҥа 2026 сылга диэри гаастааһын барыа диэтэ.  Өрөспүүбүлүкэ социальнай-экэнэмиичэскэй сайдыытын хааччыйарга 40 бөдөҥ сир баайын хостуур хампаанньаны кытта үлэ барар, муниципальнай тэрилллиилэри аахтахха, сүүскэ тиийэр. Бөдөҥ хампаанньалар улахан тэрээһиннэри өйүүллэр, эбийиэктэри туталлар, ВОЛС тардаллар. “Онон кэлиҥҥи сылларга кинилэри кытта куһаҕана суох бииргэ үлэлэһэр систиэмэ оҥоһулунна”, — диэтэ Айсен Николаев.

“Энергетика” хайысханан Госсэбиэт хамыыһыйатын үлэтин ыйыттылар. Айсен Николаев соторутааҕыта оттук-энергетическэй комплекс эйгэтигэр бырамыысыланнай куттал суох буолуутун дьүүллэспиттэрин кэпсээтэ. Саахалы аччатыы, тариф боппуруоһа — дойду үгүс эрэгийиэнигэр тирээн турар кыһалҕа буоларын эттэ.

Креативнай экэниэмикэ сырье хайысхатын кытта күрэстэһэр кыахтаныа дуо диэн ыйытыыга, Ил Дархан үбү оҥоруу өттүнэн баҕар хаһан эмит буолуон сөп диэтэ.

Дьокуускай к. баһылыгын быыбардаан талыыны тохтотуу туһунан ыйытыыга, Ил Дархан дьон талбыт дьокутааттара куорат баһылыгын талаллара ханнык да демократическай бириинсиби кэспэт диэтэ. Итиэннэ дойду билигин олох атын усулуобуйаҕа олорорун санатта. Олохтоох бэйэни салайыныыга эмиэ санаатын эттэ: “Баһылыктар 99 %-ра үлэлиэхтээх таһымнарыгар эппиэттээбэттэр, сыыһалара-халтылара элбэх. Онон биир таһымнаах тиһиккэ көһүү салайыы хаачыстыбатын тупсарыа”,- диэтэ.

Үлэлии кэлэр миграннары хааччахтааһын кэлэр 2025 сылга салҕаныа.

Ыччат үлэлээх буолуутун туһунан ыйытыыга Ил Дархан ахсынньы 1 күнүнээҕи туругунан 9,5 тыһ. вакансия баарын санатта. Итинтэн 3,5 тыһыынчата сир баайын хостуур эйгэҕэ сыһыаннаах, хамнаһа 150 тыһ. солк саҕаланар. “Билиҥҥи ыччат ХХ үйэтээҕи үлэ миэстэлэригэр барбат, онон аныгы үрдүк технологиялаах үлэ миэстэлэрин арыйан, аныгы табаары оҥорор технологиялаах производствоны тэрийэн иһиэхпитин наада”, — диэтэ.

Ситинник сылы түмүктүүр улахан пресс-кэмпэриэнсийэ олохпут бары араҥатын, хайысхатын хабан түмүктэннэ.