Бары улуустарга сылдьыбыт киһиэхэ бочуоттаах аат иҥэриллиэҕэ

Саха сиригэр олохтоох туризмы сайыннарар былааннаахтар. Ол чэрчитинэн, Саха сиригэр туризмы сайыннарыы стратегията оҥоһулунна. Саҥа стратегияҕа этиллэринэн, өрөспүүбүлүкэ 35 улууһугар барытыгар сылдьыбыт киһиэхэ анал аат иҥэриллэр буолла.

— Саха сирин олохтоохторо бэйэлэрин дойдуларыгар, өрөспүүбүлүкэ иһигэр сынньаныахтарын баҕарабыт. Биһиги өрөспүүбүлүкэбитигэр кэрэ айылҕалаах, ураты тыыннаах, киһи сынньаныан сөптөөх сирдэр элбэхтэр. Олунньу 28 күнүгэр бигэргэммит стратегияҕа суруллубутунан, 35 улууска барытыгар сылдьыбыт киһиэхэ «Саха сирин Бочуоттаах туриһа» анал аат иҥэриллиэҕэ, — диэн бырабыыталыстыба бэрэссэдээтэлин солбуйааччы Анатолий Семенов отчуот кэмигэр эттэ.

Олохтоох туризм сайдыытыгар улуустар эмиэ үлэлэһиэхтэрэ. Кэрэ, бэлиэ сирдэргэ сынньанар, хонор дьиэлэр, турбаазалар баар буолалларын хааччыйыахтаахтар.

Бүгүҥҥү туругунан, Саха сирэ Уһук Илиҥҥэ турист ахсаанынан ахсыс миэстэҕэ сылдьар. Ааспыт сылга өрөспүүбүлүкэҕэ 30 тыһыынча турист кэлэн барбыта.