Бары улуустарынан «Кыайыы былааҕа» эстэпиэтэ түмүктэннэ

Аахсыйа Саха сирин нэһилиэктэрин бүтүннүүтүн кэриэтэ хабан, «Кыайыы былааҕа» эстэпиэтэ 34 муниципальнай оройуоҥҥа ыытылынна.

Бу тэрээһин хас биирдии нэһилиэнньэлээх пуун олохтоохторугар историяны үөрэтэргэ, дьоруойдар кэриэстэрин ытыктыырга уонна көлүөнэлэр ситимнэрин салҕыырга кыах биэрдэ. Ыам ыйын 6 күнүгэр Улуу Кыайыы Былааҕа Анаабыр улууһуттан Жатайга кэллэ.

Кыайыы былааҕын көрсүү үөрүүлээх сиэрэ-туома «Маяк» култуура дьиэтигэр буолла. Тэрээһиҥҥэ салалта, уопсастыбаннас, ыччат уонна оҕолор кыттыыны ыллылар. Үгүс оҕолорго Сэбиэскэй норуот дьоруойдуу бэлиэтин кытта көрсүһүү историческай түгэнинэн буолла. Жатай баһылыга Евгения Исаева бу Кыайыы бэлиэтэ көлүөнэни ситимниирин уонна өбүгэлэрбит хорсун быһыыларын санатарын эттэ. Жатайга Кыайыы Знамята икки күн туруоҕа. Эстэпиэтэ бүтэһик кыттыылааҕар, Дьокуускай куоракка, Кыайыы былааҕын туттарыы сарсын, ыам ыйын 8 күнүгэр, ыытыллар.

«Кыайыы былааҕа» эстэпиэтэни Ил Дархан Айсен Николаев көҕүлээбитэ уонна былырыын ахсынньы ыйтан саҕаламмыта. Тэрээһин Аҕа дойду Улуу сэриитигэр Кыайыы 80 сылыгар уонна Саха сиригэр Ийэ дойдуну көмүскээччи сылыгар ананар.