“Бас билэр учаастактарын көрүөхтээхтэр”

Россельхознадзор Амур уобалаһыгар уонна Саха Өрөспүүбүлүкэтигэр управлениета быйыл тохсунньу ыйтан алтынньы 22 күнүгэр диэри 10,3 тыһ. гектар тыа хаһаайыстыбатын сирин-уотун чинчийбит. Итинтэн 6 тыһ. га – көһө сылдьан чинчийиинэн уонна 2,2 тыһ га – булгуччулаах ирдэбиллэри тутуһууну кэтээн көрүүнэн ыытыллыбыт.

Тустаах хонтуруоллуур-кэтээн көрөр тэрээһиннэр кэмнэригэр тыа хаһаайыстыбатын 266 учаастагар (иэнэ 7,7 тыһ. гектар) кэһиилэри булбуттар, чуолаан, бу сир отунан-маһынан саба үүммүт.

Сири кэтээн көрүүнү ыытыыга иниспиэктэрдэр пилота суох көтөр аппарааты (БПЛА) туһаммыттар. Бу тэрил көмөтүнэн Саха сирин киһи кыайан тиийбэт сирдэригэр 3 тыһ. гектартан тахса сири хабан, көрбүттэр.

Бэрэбиэркэлэр түмүктэринэн Россельхознадзор тустаах управлениета сири 266 туһанааччыга сокуоҥҥа олоҕуран суһал миэрэлэри ылыммыт.

Биллэрин курдук, ойуур баһаара тахсарыгар тиэриллибэтэх, отунан-маһынан үүммүт итиэннэ ааспыт сыллааҕы хаппыт ото ыраастамматах сирдэр улахан кутталы үөскэтэллэр. Кураанах отунан уот түргэнник тарҕанан дьон олорор сиригэр тиийиэн сөп. Ол иһин кытаанах хонтуруол барар. Быраҕыллыбыт бааһыналар уот тахсар биир сүрүн төрүөтүнэн буолаллар. Онон сир хаһаайыттара хайаан да бас билэр учаастактарын туһаныахтаахтар, көрө-истэ сылдьыахтаахтар, — диэн управление үлэһиттэрэ сүбэлииллэр.