«Басхан» өрөспүүбүлүкэтээҕи дьыалабыай оонньуу кылаан-чыпчаал кыайыылааҕа ааттанна

Муус устар 9-10 күннэригэр Үөһээ Бүлүүтээҕи «Тускул» оҕо айымньытын киинэ, улуустааҕы “Сомоҕо” оҕо хамсааһына, Исидор Никифорович Барахов аатынан Саха Өрөспүүбүлүкэтин судаарыстыбаннаһын түмэлэ, Саха Өрөспүүбүлүкэтин оҕолорун уопсастыбаннай холбоһуктарын сойууһа IV-төгүлүн “Басхан-2024” өрөспүүбүлүкэтээҕи дьыалабыай оонньууну Саха автономиятын төрүттээччи Степан Максимович Аржаков төрөөбүтэ 125 сылыгар анаан Семен Николаевич Донской аатынан үөрэх сайдыытын уонна идэ таһымын үрдэтэр институкка дириҥ, киэҥ суолтаны, өйдөбүлү ылан үрдүк тэрээһиннээхтик ыыттылар.

“Басхан-2024” өрөспүүбүлүкэтээҕи күрэскэ барыта 13 улуустан 15 кыттааччы күөн көрсөн, өйдөрүн-санааларын, киэҥ билиилэрин-көрүүлэрин тургуттулар. Ол курдук, Нам, Сунтаар, Амма, Томпо, Горнай, Кэбээйи, Чурапчы, Муома, Мэҥэ Хаҥалас, Бүлүү, Үөһээ Бүлүү, Анаабыр улуустарыттан, Дьокуускай куораттан кыттыыны ыллылар.

Күрэс сыалынан уол оҕону киэҥ эйгэҕэ таһаарыы, билиһиннэрии, уол оҕо, эр киһи оруолун үрдэтии, дириҥ өйдөбүллээх, киэҥ билиилээх, ырааҕы ыраҥалыыр киэҥ толкуйдаах ис санаатын, толкуйун аһаҕастык сахалыы сайа этиниитин ситиһии, төрөөбүт дойдуга, ийэ сиргэ үтүө сыһыаҥҥа иитии буолар. Күрэс биэс түһүмэҕинэн ыытылынна. Ол курдук, «Удьуор утума», «Дойду салайааччылара мин тус бэйэм көрүүбүнэн», «Өркөн өй» – ыйытыктарга хоруй, «Мөккүөр» уонна «Айыы умсулҕана» – талан ылбыт хоһоону ситэрии. Уолаттар бу биэс түһүмэҕи тургутуулары барытын этэҥҥэ ааһаннар күрэс түмүгүнэн кыайыылаахтар ааттаннылар:

Муҥутуур кылаан кыайыылаах аатын Степан Кузьмич Макаров аатынан Чурапчы гимназиятын 10 кылааһын үөрэнээччитэ Андрей Степанов ылла. Салайааччылара — Оксана Степановна Данилова, Фекла Николаевна Болдовская.

I-Үрдэл кыайыылаах аатын Мэҥэ Хаҥалас улууһун Иван Михайлович Романов аатынан Төхтүр орто оскуола 8 кылааһын үөрэнээччитэ Алгыс Попов ылла. Салайааччылара — Ольга Николаевна Максимова, Николай Федосеевич Попов.

II-Үрдэл кыайыылаах аатын Өрөспүүбүлүкэтээҕи лиссиэй-интэринээт 10 кылааһын үөрэнээччитэ Артем Яковлев ылла. Салайааччыта — Спартак Спартакович Захаров.

III-Үрдэл кыайыылаах аатын Кэбээйи улууһун Иван Егорович Левин аатынан Танара орто оскуолатын 11 кылааһын үөрэнээччитэ Георгий Готовцев ылла. Салайааччылара — Анна Дмитриевна Кычкина, Маргарита Прокопьевна Баишева.

Анал ааттар ааттаннылар:

«Кыайыыга дьулуур”- Василий Егоров, Анаабыр улууһа, Үрүҥ хайа орто оскуолатын 10 кылааһын үөрэнээччитэ. Салайааччы — Степан Васильевич Васильев.

“Киэҥ көрүүлээх БАСХАН” — Анатолий Николашкин, Өрөспүүбүлүкэтээҕи лиссиэй-интэринээт 11 кылааһын үөрэнээччитэ. Салайааччыта — Айина Гаврильевна Филиппова.

“Иэйэр куттаах БАСХАН” -Иннокентий Боронов, Бүлүү улууһа, Евдокия Александровна Степанова аатынан Тоҕус уопсай үөрэхтээһин орто оскуолатын 9 кылааһын үөрэнээччитэ. Салайааччылара — Мария Ивановна Унарова, Сардана Прокопьевна Боронова.

«Хомоҕой тыл БАСХАНА” — Айаан Горохов, Сунтаар улууһа, Сунтаардааҕы политехнический лиссиэй-интэринээт 9 кылааһын үөрэнээччитэ. Салайааччы — Тускулаана Васильевна Горохова-Кобельянова.

«Сайдам санаа БАСХАНА” — Петр Осипов, Нам улууһа, Модут орто оскуолатын 10 кылааһын үөрэнээччитэ. Салайааччыта — Александра Николаевна Осипова.

«Удьуор утуму салгыыр БАСХАН» — Дьулус Андреев, Горнай улууһа, Семен Данилов аатынан Бэрдьигэстээх орто оскуолатын 10 кылааһын үөрэнээччитэ. Салайааччыта— Руслан Рустамович Семенов.

“Өркөн өй БАСХАНА” — Георгий Готовцев, Кэбээйи улууһа, Иван Егорович Левин аатынан Танара орто оскуолатын 11 кылааһын үөрэнээччитэ. Салайааччылара — Анна Дмитриевна Кычкина, Маргарита Прокопьевна Баишева.

“Ылыннарыылаах тыл БАСХАНА” — Олег Андреев, Үөһээ Бүлүү улууһа, Дмитрий Спиридонович Спиридонов аатынан орто оскуола 10 кылааһын үөрэнээччитэ. Салайааччылара-Тамара Афанасьевна Данилова, Егор Борисович Борисов.

“Кэрэхсэбиллээх кыттааччы” — Мирослав Терешкин, Муома улууһа, Муома орто оскуолатын 9 кылааһын үөрэнээччитэ. Салайааччылара — Татьяна Ивановна Данилова, Саргылана Евгеньевна Винокурова.

“Тобуллаҕас толкуй” — Артём Марков, Амма улууhа, Леонид Васильевич Киренскай аатынан Амматааҕы лиссиэй 11 кылааhын үөрэнээччитэ. Салайааччылара — Наталия Константиновна Рязанская, Розалия Николаевна Павлова.

«Уран тыл БАСХАНА» — Илья Саввинов, Үөһээ Бүлүү улууһа, Петр Николаевич Тобуруокап аатынан орто оскуола 11 кылааһын үөрэнээччитэ. Салайааччылара — Юлия Дмитрьевна Протодьяконова,  Василий Никифорович Петров.

«Кэскиллээх кыттааччы” — Альберт Егоров, Томпо улууһа, Егор Петрович Неймохов аатынан Мэҥэ Алдан орто оскуолатын 9 кылааһын үөрэнээччитэ. Салайаччылара — Татьяна Егоровна Ордахова, Виктория Владимировна Бурцева.

Тэрийээччилэр Саха Өрөспүүбүлүкэтин оҕолорун уопсастыбаннай холбоһуктарын сойууһун бэрэссэдээтэлигэр Геннадий Иванович Охлопковка, Үөһээ Бүлүүтээҕи И.Н.Барахов аатынан судаарыстыбаннай түмэл научнай үлэһитигэр Евдокия Павловна Семеноваҕа, Үөһээ Бүлүүтээҕи оҕо бибилэтиэкэтин сүрүн бибилэтиэкэригэр Майя Федоровна Захароваҕа, 11 сыл бэриниилээхтик дьүүллүүр сүбэ бэрэссэдээтэлинэн үлэлиир Алексей Васильевич Руфовка уонна түһүмэх аайы уларыйа сылдьар эспиэрдэргэ, Семен Николаевич Донской аатынан үөрэх сайдыытын уонна идэ таһымын үрдэтэр институкка улахан махталларын тиэрдэллэр.

«Басхан» дьыалабыай оонньуу уол оҕолору аныгы сайдыы суолун тутан, Сахабыт сирин уолаттарын түмэр киэҥ түһүлгэтэ кэнчээри ыччакка кэскиллээҕи түстээтин, үтүөнү ыраҥалаатын. Сахабыт сирин инники эрэллэригэр, басхан уолаттарбытыгар салгыы ситиһиини баҕарабыт.