Бассейн, каток да оҥордохторуна… 

Кэлэр нэдиэлэҕэ өрөспүүбүлүкэни салайар ситэриилээх былаас 2024 сыллааҕы үлэтин Өлөөн олохтоохторун иннигэр отчуотун иһитиннэрэ кэлэрэ күүтүллэр.

Биһиги улууспутугар былырыыҥҥы отчуот мунньаҕар этиллибит этиилэр боротокуолга суруллан толорууга сорудахтаммыттара. Бу отчуокка кэлэр бөлөхтөн ыйытыахха наада: боротокуолга киирбит накаастар туолуулара хайдах хонтуруолланарын, ый аайы, декаданан, сыл аҥаара буолан баран дуу диэн. Министиэристибэлэр салайааччыларыгар олох-дьаһах, үөрэх, оҕону иитии, атыы-эргиэн, суол-иис, көтөр аалынан көтүү сыанатын, доруобуйа харыстабылын, тыа хаһаайыстыбатын салаалара сайдыыларын туһунан ыйыталаһан, эппиэттэрин истэн баран кэскиллээх этиилэри, анал бырагыраамалары олохтоохтук туруорсуохтаахпыт.

Төһө даҕаны үчүгэйдик олоробут диэбиппит иһин, сыана ыараханын бары билэбит. Уһун тымныылаах, кылгас сайыннаах дойдуга тыын боппуруостар, биир күн иһинэн быһаарыллыбат кыһалҕалар элбэхтэр, суох буолбатахтар. Олох-дьаһах тупсарыгар бары баҕарабыт, чугас олорор Удачнай, Айхал бөһүөлэктэрэ хайдах курдук сайдыылаахтарын айаннаан иһэн көрөн, ымсыыран ааһабыт. Биһиги улууспут итинник таһымҥа тоҕо тиийбэтий!?

Алмаас, көмүс хостооччуларга ааспыт үйэҕэ олохтоохтор барахсаттар төһөлөөх көмөлөспүттэрин туһунан ханна да ахтыбаттар, ааттарын да ааттаабаттар. Дьиҥинэн, урут кэтэх табалаах буолан ийэлэрбит, аҕаларбыт кыра оҕолоох көсүһэ сылдьан суолларын-иистэрин хааллардахтара. Биир эмит доруобуйаны чэбдигирдэр үчүгэй эбийиэги тутан оҕолорго бэлэх оҥоруохтарын сөп этэ, холобур, бассейн, каток. Харыйалаах бөһүөлэгэр атыы-эргиэн дьиэтэ түөрт уон сылтан ордук турда, тутуллубута ыраатта. Тымныытынан аатырбыт дьиэ, оттон дьон үчүгэй тутуулаах, саҥалыы маҕаһыыҥҥа кэлэн тураллара буоллар конкуренция үөскээн, сыана да Өлөөнү кытта тэҥнэһиэ этэ.

Аны уматык, бородуукта сыаналара сылга хаста да үрдүүр, хайдах хамнас, биэнсийэ үрдүүрүн иһиттилэр да, уматык сыаната күнүн да аһарда түспэттэр, түргэн үлүгэрдик сыананы улаатыннара охсоллор. Кып-кыра биэнсийэҕэ айахтарын ииттэн олорооччуларга сыана бас баттах үрдүүрэ охсуулаах, уот, ититии иһин төлүүргэ эрэ тиийэр.

23 киилэ ыйааһыннаах биир суумка көҥүллэнэрэ сөп дуо?

Олохтоохтор сырыы аайы туруорсар боппуруоспут: көтөр аалынан айанныырга киһиэхэ 23 киилэ ыйааһыннаах биир суумка көҥүллэнэр, онтубут ыйааһына кыра кыахтаах киһи хайдах да сиртэн да өндөппөт. Бу тугуй, ким олохтообут бэрээдэгэй, быраабылатай дуу?

Маны тэҥэ аэровокзал дьиэтэ эргэрбитин, тымныытын элбэх киһи бэлиэтиир, аныгы ирдэбилгэ эппиэттиир гына хаачыстыбалаах өрөмүөн үлэтэ ыытыллара буоллар. Сырдык, сылаас, бары өттүнэн хааччыллыылаах кабинеттарга үлэһиттэр үлэлииллэригэр да табыгастаах буолуо этэ. Оттон улуус сайдыытыгар, тэнийиитигэр улахан суолталаах авиация буолар.

Дьиҥэ, бу эрэ буолбатах, быһаарыллыбакка турар боппуруос элбэх: бултааһын, балыктааһын көҥүлэ, бырамыысыланнас. Ахсынньы, тохсунньу тоһуттар тымныытыгар кыыл табаны бултаан оҕолорун, аймахтарын аһатаары дьоммут доруобуйалара да айгырыыр. Маннык сокуон сиэргэ-быһыыга баппат, олохтоохтору киһинэн аахпат курдук сыһыаннаһыы да диэххэ сөп.

Уларыйыы бөҕө буолаары турар, КлиКра сокуонун тула улахан кэпсэтии тахсара наада, бу биһиэхэ ханан да сөп түбэспэт. Этии киллэрэ туруохха, оччоҕо баҕар хамсааһын тахсыаҕа, оннооҕор таммах уута тааһы аалан тэһэр дииллэр.

Онон, ханнык эйгэҕэ бытаарыы,  хаалыы тахсыбытын отчуоттуу-кэпсии кэлэр салайааччыларга санааны этэн, хоруйдарын истэн, туһалаах кэпсэтии тахсан, бары үчүгэйдик олорорбут туһугар, кыаллыбат сатанарын туһугар кэпсэтэн, туруорсан, буолаары турар отчуоттарга көхтөөхтүк кыттаргытыгар ыҥырабын.

Надежда Колодезникова, Өлөөн