Бастакы агротехнологическай кылаас аһылынна

Хаҥалас улууһун ини-бии Николаевтар ааттарынан 2-с Дьөппөн оскуолатыгар агротехнологическай кылаас аһылынна. Оҕолор номнуо тэрээһин аһыллыытыгар ыаммыт үүтү сүүрдэн көрдөрүлэр.  

Тустаах кылаас дойду Бэрэсидьиэнэ Владимир Путин көҕүлээбит, сыл саҕаланыаҕыттан Саха сиригэр олоххо киирбит “Ас-үөл технологическай өттүнэн куттала суох буолуутун хааччыйыы” национальнай бырайыак чэрчитинэн “Кадры в АПК” эрэгийиэннээҕи чааһынан буолар.

Бырайыак инвестора – “Өктөөп 50 сыла сопхуос” тыа хаһаайыстыбатын кэпэрэтиибин бэрэссэдээтэлэ Тихон Скрябин. Биотехнология уонна аһылык бырамыысыланнаһа хайысхалары талбыттар, онон кэбиниэттэри манна ирдэнэр аныгы тэрилинэн хааччыйбыттар. Оҕолор биологияны, химияны, физиканы уонна математиканы дириҥэтэн үөрэтиэхтэрэ.

Дириэктэр Дарья Скрябина салайааччылаах педагогическай кэлэктиип, оскуола үөрэнээччилэрэ тыа хаһаайыстыбатыгар үлэлээн дохуот киллэринэллэригэр болҕомтону уурар санаалаах. “Биһиги оскуолабытыгар үгэс быһыытынан аграрнай идэни баһылыан баҕарар оҕо элбэх. Бүгүн аһыллыбыт агротехнологическай кылаас көмөтүнэн биһиги кинилэри тыа хаһаайыстыбатын оҥорон таһаарыы теориятыгар уонна быраактыкатыгар үөрэтиэхпитин сөп – номнуо оскуолаттан саҕалаан эт, үүт бородууксуйата хайдах оҥоһулларын билиэхтэрэ. Бу сатабыллар улааттахтарына олохторугар туһалыаҕа, саамай сүрүнэ – тыа сирин олохтооҕун үлэтин сыаналыыр уонна төрөөбүт дойдутун дьиҥнээх патриотун иитэн таһаарар соругу туруорабыт” — диэн Дарья Скрябина бэлиэтиир.

Үөрэх уонна билим министиэристибэтэ оскуолаҕа саҥа кылааска туһаныллар анал тэрили ылалларыгар сэртипикээт биэрбит. Сыл түмүктэниэр диэри “Кадры в АПК” эрэгийиэннээҕи бырайыак иитинэн И.Е.Федосеев-Доосо аатынан Дириҥ агро оскуолатыгар уонна Сэбиэскэй Сойуус Дьоруойа Ф.К.Попов аатынан Баатара оскуолатыгар эмиэ агротехнологическай кылаастар аһыллыахтара.

Бу туһунан Үөрэх уонна билим министиэристибэтин саайтыгар суруйаллар.