Бастакы геоглиф Улуу Кыайыы дьоруойдарын үйэтитиэ

Дьокуускайдааҕы Күнү-дьылы кэтээн көрөр сулууспа территориятыгар ураты тыыннаах пааматынньыгы – 600 бэс үнүгэһин олордон «Кыайыы-80» геоглифы оҥордулар. Бу үөһэттэн чуолкайдык көстөр дьикти эбийиэк СӨ Экологияҕа министиэристибэтин көҕүлээһининэн өрөспүүбүлүкэтээҕи «Күөх Чэппиэр» экологическай бырайыагынан уонна Бүтүн Арассыыйатааҕы «Кыайыы ойуура» патриотическай аахсыйа чэрчитинэн олоххо киирдэ.

Тэрээһин үөрүүлээх аһыллыытыгар СӨ Бырабыыталыстыбатын Бэрэссэдээтэлин солбуйааччы Ольга Балабкина, Дьокуускайдааҕы Күнү-дьылы кэтээн көрөр сулууспа начаалынньыгын солбуйааччы Татьяна Маршалик кытыннылар, мустубут дьону эҕэрдэлээтилэр. Маһы олордууну СӨ экологияҕа, айылҕаны туһаныыга уонна ойуур хаһаайыстыбатын миниистирэ Евгений Перфильев саҕалаата.

«Кыайыы-80» геоглиф оҥоһуллуута – бу биһиги олохторун эйэ туһугар толук уурбут дьоруойдарбыт өйдөбүллэрин кэрэһилиир ньымабыт. Биһиги 600 кэриҥэ бэс үнүгэһин олортубут уонна кинилэр үчүгэйдик үүнэн, Дьокуускай олохтоохторун үөрдүөхтэрэ диэн эрэнэбит. Биһиги исписэлиистэрбит үнүгэһи бүөбэйдээн үүннэриэхтэрэ. Бу үйэлээх пааматынньык буолуоҕа», – диэн Евгений Перфильев устуоруйа өйдөбүлүн харыстааһын суолтатын тоһоҕолоон эттэ.

«Кыайыы-80» геоглиф аҥаардас өйдөбүнньүк бэлиэтэ эрэ буолбакка, көлүөнэлэр айылҕалыын быстыспат ситимнэрин кэрэһилиир Саха сирин экологиятыгар улахан кылаатынан буолар.

СӨ Экологияҕа министиэристибэтэ тэрээһин бары кыттыылаахтарыгар, чуолаан Дьокуускайдааҕы Күнү-дьылы кэтээн көрөр сулууспаҕа, «Дьокуускай» аэропордугар, ВТБ бааҥҥа, Рослесинформ тэрилтэҕэ, Дьокуускай куорат дьаһалтатыгар, АГАТУ, ЯСХТ, Анал байыаннай дьайыы судаарыстыбаннай пуондатыгар, «Алмазэргиэнбааҥҥа», «Полярнай авиалиниялар» авиахампаанньаҕа, «АЛРОСА» АХ-ҕа, «Сахатранснефтегаз» хампаанньаҕа, уопсастыбаннас уонна маассабай иһитиннэрэр-көрдөрөр тэрилтэлэр бэрэстэбиитэллэригэр, кинилэр көхтөөх гражданскай позицияларын уонна устуоруйа өйдөбүлүн харыстааһыҥҥа улахан кылааттарын иһин ис сүрэхтэн махталларын тиэрдэллэр.