Бастакы Хомустаахха үс мэндиэмэннээх саҥа дьиэ үлэҕэ киирдэ

Нам улууһугар  «Хаарбах уонна саахалланар туруктаах дьиэттэн дьону көһөрүү» бырагырааманан үлэ тиһигин быспакка ыытыллар.

Тохсунньу 17 күнүгэр Бастакы Хомустаах нэһилиэгэр толору хааччыллыылаах, 20 квартиралаах 3 этээстээх саҥа  таас дьиэ үлэҕэ киирдэ.

Тутуу үлэтин Алексей Пинигин салайааччылаах «Прогресс» ХЭТ ыытта. Бэлиэтээн эттэххэ, аҥаардас бу нэһилиэккэ «Прогресс» ХЭТ туппут төрдүс дьиэтэ буолар. Баара-суоҕа балтараа сыл анараа өттүгэр бастакы сыбаайа түспүтэ уонна номнуо үлэҕэ киирэн олохтоохтору үөртэ. Былаан быһыытынан бу дьиэ бастакы этээһигэр кэмиэрчэскэйэ суох  тэрилтэлэр киириэхтээхтэр.

Үөрүүлээх тэрээһиҥҥэ улуус баһылыга Юрий Слепцов, Бастакы Хомустаах нэһилиэгин баһылыга Василий Жирков, «Прогресс» ХЭТ директорын солбуйааччы Андрей Протодьяконов уонна саҥа дьиэ хаһаайката, педагогическай үлэ бэтэрээнэ Елена Неустроева аалай лиэнтэни быстылар. Салгыы сылаас дьиэҕэ киирэн, алгысчыт Петр Охлопков сахалыы сиэринэн аал уоту оттон, арыылаах алаадьынан, уохтаах кымыһынан күндүлээтэ.

Улуус баһылыга Юрий Слепцов, Бастакы Хомустаах нэһилиэгин баһылыга Василий Жирков, «Прогресс» ХЭТ генеральнай директора Алексей Пинигин, «Алмаасэргиэнбаан» АКБ АО корпоративнай департаменын директора Егор Спиридонов, улуустааҕы капитальнай тутуу уонна архитектура начальнига Петр Эверстов олохтоохтору баҕа санаалара туолбутунан истиҥник эҕэрдэлээтилэр. Тутуу үлэтигэр сүҥкэн кылааттарын киллэрбит, сыраларын биэрбит туруу үлэһиттэргэ махтал суруктары, наҕараадалары туттардылар. Олохтоохтор ааттарыттан Екатерина Быканова уонна Галина Попова улуус, олохтоох дьаһалта баһылыктарыгар, бырабыыталыстыба  салайааччыларыгар, «Прогресс» ХЭТ коллективыгар, хас биирдии үлэлэспит дьоҥҥо барыларыгар улахан махталларын тиэртилэр, үөрүүлэрин үллэһиннилэр.

«Прогресс» ХЭТ генеральнай директора Алексей Семенович маннык дьиэлэр тутуллан үлэҕэ киириилэрэ улуус, олохтоох дьаһалталар, бырабыыталыстыба  биир санаанан үлэлэһиилэрин түмүгэ буоларын бэлиэтээн эттэ. Хас биирдии туппут элбэх квартиралаах дьиэ ытык кырдьаҕаһыгар телевизор биэрэр үгэстээхтэр эбит. Онон, саҥа дьиэ хаһаайката Елена Ивановна саҥа телевизор бэлэх тутан үөрүүтэ үксээтэ.

«Нам улууһа» МТ пресс-сулууспата