«Бастакы хомуур» — төрөппүттэр устубут киинэлэрэ

Мүрү 2 №-дээх орто оскуолатын «Ситим» төрөппүт сүбэтэ төрөппүттэри, оскуоланы, уопсастыбаннаһы кытта ыкса ситимнээхтик үлэлэһэр.

Оскуолаҕа төрөппүт сүбэтин бэрэссэдээтэлэ Д.П. Егорова сатабыллаах салалтатынан Ю.А.Бурцева, Д.А. Местникова, Е.С.Захарова, П.П.Аммосов, Г.С.Слепцов, П.И. Нестерев састааптаах 2024-2025 үөрэх дьылларыгар таһаарыылаахтык үлэлээбиттэр.

Биир ураты уонна сонун үлэлэринэн киинэ устуута буолбут. Ол курдук, Аҕа дойду сэриитигэр Улуу Кыайыы 80 сылынан үөрэнээччилэри, төрөппүттэри түмэ тардан «Бастакы хомуур» диэн киинэ устубуттар. Бу үлэлэрин туһунан киинэ режиссера, ааптара, төрөппүт сүбэтин көхтөөх кыттааччыта Павел Петрович Аммосов маннык сырдатта:

—Киинэ устуохха дуу  диэн толкуй, санаа баара. Ону былырыын, 2024 сылга, төрөппүт кэмитиэтигэр уонна биһигини кытта үлэлэһэр оскуолабыт куратордарыгар эппитим. Бары биһирии истибиттэрэ, сөбүлэспиттэрэ. Онон саҥа 2025 сылга ыам ыйын 9 күнүгэр диэри устан таһаарыаҕыҥ диэн былааннанан үлэбитин саҕалаабыппыт.

Өр соҕус тиэмэтин толкуйдаабытым. Онтон сэриигэ Уус Алдантан барбыт буойуннар саҥа көстүбүт хаартыскаларын туһунан ыстатыйаны түбэһэ көрөн, бу иннинэ биһиэхэ улаханнык таарыллыбатах тиэмэ диэн, бастакы хомуур туһунан устарга толкуй киирбитэ. Матырыйаал хомуйан баран, сценарийы Екатерина Свинобоеваҕа, Чараҥ кулуубун уус-уран салайааччытыгар көрдөһөн суруйтарбытым. Үлэбит муус устар бүтэһик күннэриттэн саҕаламмыта. Оскуолабыт дириэктэрэ Мигалкин* Алексей Михайлович оператор Василий Заболоцкайы кэпсэтэн, биһиэхэ сыһыаран, биһиги артыыстарбытын булаттаан, сорох оруоллары кастинг ыытан таламмыт, ыам ыйыттан устан саҕалаабыппыт. Артыыстарбыт барыта оскуолабыт оҕолоро, үөрэнээччилэрбит эһээлэрэ, эбээлэрэ, төрөппүттэрэ уонна оскуола учууталлара. Ыам ыйын 9 күнүгэр «Мүрү саһарҕата» улууспут олохтоох хаһыатын тг-страницатыгар, оскуола вк тахсан дьон көрүүтүгэр, сыанабылыгар тарҕаммыта.

Киинэбит дьоруойа — Миитэрэй. Бу оруолу бэйэм толордум. Онтон бу көрөр урукку хаартыскаҕытыгар кини баар уонна бу 37 киһи барбытыттан, үһүө буолан тыыннаах эргиллибиттэр. Хомойуох иһин, эргиллэн кэлбит икки киһибит ааттара-суоллара биллибэтэ, көстүбэтэ. Аммосов Дмитрий Фёдорович (Миитэрэй) видеоҕа урукку ахтыытын (архыып) уола Аммосов Владимир Дмитриевич ыытан улаханнык көмөлөстө. Дьэ онон, оскуолабыт, төрөппүттэр, нэһилиэкпит дьонун көмөлөрүнэн итинник киинэлэннибит.

Бу кэнчээри ыччат историяны билэригэр, билиитин-көрүүтүн хаҥатарыгар, дойдутугар харыстабыллаах сыһыаннаах буола улаатарыгар, дьонун-сэргэтин ытыктыырыгар ананар.

Павел Аммосов, «Ситим» төрөппүт кэмитиэтин чилиэнэ.

Хаартыскалар Павел Аммосов тиксэриилэрэ