Бастакы кылаас үөрэнээччитэ байыастарга балык кэһиитин ыытта

Үөһээ Бүлүү улууһун Ороһу орто оскуолатын 1-кы кылааһын үөрэнээччитэ байыаннай дьайыы кыттыылаахтарыгар анаан муус аннынан балыктаан булдун Балыксыт Ольгаҕа-Ольга Захароваҕа байыастарга тиэрдэргэ туттарда. Бу туһунан «Үөһээ Бүлүү» хаһыат суруйар.

Бу күннэргэ эдэр балыксыт уол балык арааһын хаптаран,  байыаннай дьайыыга сулууспалыы сылдьар биир дойдулаахтарыгар, ону таһынан эһэлээх эбэтигэр уонна дьиэлээхтэригэр ирээттээн, толору дьоллонно.

Булдун балыксыт уолчаан ийэтин кытта саарылаан, байыастарга анаан минньигэс күстэхтэри Балыксыт Ольгаҕа туттардылар. Ону таһынан күстэхтэри Ольга Захарова хатаран, саарылаан, тууһаан буойуттарга аадырыстанан айанныахтара. Ийэ дойдуларын дьоллоох олоҕун туруулаһа сылдьар биир дойдулаах байыастарыгар анаан бултаммыт кырачаан уол булда сотору кэминэн аадырыстаахтарга тиийэригэр эрэнэллэр.