Бастакы кылааска киирэр оҕо тугу билиэхтээҕий, сатыахтааҕый?

Бастакы кылааска киирэр оҕо тугу билиэхтээҕин уонна сатыахтааҕын туһунан «Об утверждении федеральной образовательной программы дошкольного образования» диэн РФ Үөрэҕириигэ министиэристибэтин 1028 №-дээх бирикээһигэр суруллар. Ону туһанан, объясняем.рф саайт маннык суруйбут.

Уопсай сайдыыта:

— аатын, араспаанньатын, сааһын, төрөппүттэрин аатын, дьиэтээҕи аадырыһын билэр буолуохтаах;

— ханнык дойдуга, куоракка/нэһилиэккэ олорорун билиэхтээх;

— дьыл кэмнэрин, нэдиэлэ күннэрин, суукка чаастарын, уҥа-хаҥас хайысханы билиэхтээх;

— идэлэри, тырааныспар көрүҥнэрин билиэхтээх.

Математика уонна логика:

— 10-ҥа диэри уонна төттөрү ааҕыахтаах;

— сыыппаралары, устууканан хас биридимиэт баарын билиэхтээх;

— биридимиэттэри кээмэйинэн, үрдүгүнэн быһаарыахтаах: улахан/кыра, үрдүк/намыһах;

— геометрическай фигуралары араарыахтаах: төгүрүк, түөрт муннук, үс муннук;

— чэпчэки логическай эрчиллиилэри суоттуохтаах: ордук биридимиэти булууну, туох кэнниттэн туох кэлэрин быһаарыыны уо.д.а.

Саҥа уонна ааҕыы:

— дорҕооннору чуолкайдык саҥарыахтаах;

— 5-7 тыллаах этиилэри оҥоруохтаах, кылгас кэпсээни кэпсиэхтээх;

— тылга дорҕооннору араарыахтаах: бастакы/бүтэһик, аһаҕас дорҕоон/бүтэй дорҕоон;

— хоһоону өйтөн ааҕары сатыахтаах;

— сатаан ааҕар буоллаҕына, тугу аахпытын өйдүөхтээх.

Суруйуу уонна моторика:

— уруучуканы, харандааһы, кыптыыйы сөпкө тутуохтаах;

— судургу фигуралары уруһуйдуохтаах, кичэллээхтик кырааскалыахтаах;

— буукубалары, сыыппаралары суруйуохтаах.

Тулалыыр эйгэ: 

— кыыллары, үүнээйилэри, айылҕа көстүүлэри билиэхтээх;

— сэрэхтээх буолуу сүрүн быраабылаларын билиэхтээх: билбэт дьоҥҥо ааны арыйбат буолууну, светофор күөх уотугар суолу туорууру.

Быһыыта-майгыта:

— биир саастыылаахтарын кытта сатаан кэпсэтиэхтээх: бэрсэр, сүбэлэһэр, мөккүөрү быһаарар;

— улахан дьон көрдөһүүтүн толоруохтаах, бөлөххө баар быраабылалары тутуһуохтаах;

— «махтал», «баһаалыста», «алы гыныҥ» тыллары билиэхтээх, туттуохтаах;

— сатаан бэйэтэ таҥнар, таҥаһын хомуйар, малын дьаарыстыыр, хомунар буолуохтаах.

Эт-сиин бэлэмэ:

— сүүрэр, ыстанар, кирилиэһи тахсар;

— мээчиги хабар, быраҕар;

— кыра ноҕуруускалары тулуйар.

Айар дьоҕура:

— уруһуйдуур, аппликация оҥорор, пластилин сыбыыр;

— ыллыыр, муусуканан хамсанар, сыаҥкаларга кыттар.