Бастакы күүлэттэр отчуокка уоттаах-төлөннөөх тыллары эттилэр

Саха Өрөспүүбүлүкэтин ситэриилээх былааһын отчуоттуур бастакы бөлөҕө Бүлүү улууһугар үлэтин ыраах сытар I Күүлэт нэһилиэгиттэн саҕалаата.

Бу нэһилиэк Бүлүү улууһун өрүс уҥуор сытар нэһилиэктэриттэн саамай элбэх нэһилиэнньэлээхтэрэ. Аҕыйах сыллааҕыта 1000-н тахса нэһилиэнньэлээх буоллаҕына, билигин 860 киһи олорор. Саха омук сиэринэн ынах сүөһү, сылгы иитиитинэн дьарыктанар. Манна «I Күүлэт» диэн тыа хаһаайыстыбатын оҥорон таһаарар кэпэрэтиибэ сүөһүнү, сылгыны тутан олорор.
Олохтоохтор бэлиэтииллэринэн, кэнники сылга киһи ахсаана эбиллэр, ыччат төннөн кэлэн дойдутун туһугар үлэлиир-хамсыыр. Оскуола 150 үөрэнээччилээх, оҕо уһуйаана 70 иитиллээччилээх.

СӨ Бырабыыталыстыбатын бэрэссэдээтэлин солбуйааччы Михаил Никифоров өрөспүүбүлүкэ салалтатын 2022 сыллаах үлэтин туһунан кэпсээтэ. Ол кэннэ оробуочай бөлөх тута олохтоохтор ыйытыыларыгар хоруйдаата.
Бэлиэтээн эттэххэ, күүлэттэр уоттаах-күөстээх тыллары эттилэр. Бастакынан «I Күүлэт» кэпэрэтиип салайааччыта Елена Тутукарова чэбдигирдии бырагырааматын туһунан ыйыталаста. Иккис боппуруоһунан, хотону туттууга көмө туһунан буолла.

Оскуола дириэктэрэ Сардаана Томская абаран туран «бытыктаммыт», өр кэмҥэ тутуута кыайтарбатах оскуолабыт саҥа үөрэх дьылыгар киириэ, онно бырайыакка баар барыта оҥоһуллуо дуо диэн ыйытта.

Бэтэринээр Прокопий Николаев нэһилиэк ыччата успуордунан дьарыктаныан баҕарарын, онно саала суоҕун туруоруста.
Онтон нэһилиэк олохтооҕо Александра Федорова өртөөһүн, ходуһалартан ууну түһэрии итиэннэ үүт туттарыытын төлөбүрэ хайдах быһыылаахтык оҥоһулларын туһунан туоһуласта.
Быйыл бөрө элбээтэ, ону өлөрөргө туох ньымалары туһаналларый уонна төлөбүрэ төһөнүй диэн нэһилиэк ытык кырдьаҕаһа Виктор Семенов ыйытта. Кини быстах дьайыыларга сылдьар дьоммутун өйүүр сыаллаах Саха сирин Дьоруойа диэн ааты олохтуохха диэн туруорсабыт диэтэ.

Ытык кырдьаҕас Егор Васильев отчуоттуур бөлөххө үлэһит дьону өйөөн, болҕомто уураргыт буоллар диэтэ. Кини нэһилиэги, улууһу үүтүнэн-этинэн хааччыйар, үрдүк күүрүүлээх лииньийэни таттаран, хаһаайыстыба тэринэн, элбэх киһини үлэнэн хабарынан, Елена Тутукарова үлэтин сыаналыылларыгар көрдөстө.

Кэпсэтии кэмигэр уһун-киэҥ дакылаатынан тыа хаһаайыстыбатын кыһалҕатын, сүөһү, сылгы иитиитин, үлэ хайдах тэриллиэн, боппуруос хайдах быһаарыллыан сөбүн туһунан Елена Тутукарова кэпсээтэ. Оттооһун атахтаныыта ааспыт сылга айылҕа содулуттан, ардахтан тахсыбытын, комбикорм кыстыгы туораан эрдэхтэринэ, саҥа кэлэн эрэрин, от сыаната мэнээк барбытын эттэ. Тыа хаһаайыстыбатын министиэристибэтин үлэтэ мөлтөх диэн быһаарда.

Нэһилиэнньэ үлэҕэ-хамнаска инники сайдыы туһугар, боппуруостары сөпкө туруоран, кыһалҕатын аһаҕастык уоттаах-төлөннөөх тылларынан эттэ.
Мунньах түмүгүнэн олохтоохтор ситэриилээх былаас үлэтин ортонон сыаналаатылар.