Бастакы оҕоҕо ийэ хапытаалын 1 мөл. солк. диэри улаатыннарыахтара

Судаарыстыбаннай Дуума Үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин бэрэссэдээтэлэ Ярослав Нилов РФ Бырабыыталыстыбатыгар саҥа сокуон барылын ыытта. Сокуон барылынан бастакы оҕо төрөөтөҕүнэ ийэ хапытаалын 1 мөлүйүөн солкуобайга, оттон иккис эбэтэр үһүс оҕоҕо – 1,3 мөлүйүөн солкуобайга диэри улаатыннарар кыах көрүллүөҕэ.

Бу туһунан ТАСС иһитиннэрэр. Сокуон барылыгар «Оҕолоох ыалларга судаарыстыба өттүттэн эбии өйөбүл миэрэлэрин туһунан» сокуоҥҥa уларытыылары киллэрэн, ийэ хапытаалын саҥа кээмэйин олохтуур туһунан этиллэр.

Өскөтүн өйөбүлү ылар быраап 2026 сыл тохсунньу 31 күнүгэр диэри үөскээбит буоллаҕына, суумата 1 мөлүйүөн солкуобай буолуоҕа. Итинник суума 2026 сыл олунньу 1 күнүн кэнниттэн төрөөбүт эбэтэр иитиигэ ылыллыбыт бастакы оҕоҕо эмиэ этиллэр. Иккис оҕо төрөөтөҕүнэ төлөбүр 300 тыһыынча солкуобайынан улаатан, 1,3 мөлүйүөн солкуобайга тиийиэҕэ. Ону таһынан, өскөтүн бастакы оҕо 2026 сыл олунньу 1 күнүгэр диэри төрөөбүт буоллаҕына, иккис оҕо төрөөһүнүгэр ийэ хапытаала 1,3 мөлүйүөн солкуобай буолуоҕа диэн көрүллэр. Бу сууманы, ыал урут маннык өйөбүлү ылбатах буоллаҕына, үһүс уонна онтон кэлэр оҕолорго төлүүр былааннанар.

Нилов этэринэн, ийэ хапытаалын бырагыраамата 2030 сылга диэри уһатылынна уонна бэйэтин үчүгэй өттүттэн көрдөрдө. Билигин ити бырагырааманы, ол иһигэр төлөбүрүн улаатыннаран, өссө тупсарар уонна күүһүрдэр наада. Билиҥҥи туругунан, ийэ хапытаалын кээмэйэ бастакы оҕоҕо 690 266 солкуобайга тэҥнэһэр, оттон иккис оҕоҕо эбии 221 895 солкуобай бэриллэр (икки оҕоҕо холбоон — 912 162 солкуобай).