«Бастакылар Хамсааһыннара» Саха сиригэр 57 бырайыагы олоххо киллэрэр

“Бастакылар Хамсааһыннара” Арассыыйатааҕы уопсастыбаннай-судаарыстыбаннай оҕо-ыччат хамсааһына Саха сиригэр 57 бырайыагынан үлэлиир. Ол онтон 51-рэ – бүтүн Арассыыйатааҕы бырайыактар, алтата эрэгийиэннээҕи.

“Быйыл эрэгийиэннээҕи салаа Бастакылар Хамсааһыннара күөҥҥэ тутар бырайыактарын ситиһиилээхтик олоххо киллэрдэ: Бүтүн Арассыыйатааҕы “Биһиги – Арассыыйа гражданнарабыт” бырагырааманы, “Бастакылар Ыҥырыылара”, “Бастакылар Юннаттара” бырайыактары, “Зарница 2.0” байыаннай-патриотическай оонньууну. Олоххо киирэн эрээччилэргэ киирсэллэр Бүтүн Арассыыйатааҕы бырайыактар: “Устуоруйаны харайааччылар”, “Үтүөнү оҥор”, “Бастакы көмө”, “Учуонайга ыалдьыттыы”, “Идэҕэ бастакылар”, ону тэҥэ “Чугас дьонум – таптыыр дьонум” дьиэ кэргэн пуорума. Маны таһынан эрэгийиэннээҕи бырайыактары ыыппыппыт: “Мин дойдум ырыалара” хор кэлэктииптэригэр өрөпсүүбүлүкэтээҕи куонкуруһу, оскуолаларга билим-чинчийэр эспэдииссийэлэри, оскуола эйгэтигэр көрүү-куонкуруһу”, — диэн Бастакылар Хамсааһыннарыгар кэпсээтилэр.

Сэтинньи 8 күнүгэр 25980 кыттааччылаах 30 бырайыак ыытыллыбыт.

Быйыл 100 үөрэнээччи Бастакылар Хамсааһыннарын бырайыактарынан федеральнай уонна уокуруктааҕы түһүмэхтэр финалистарынан уонна кыттааччыларынан буоллулар, ол курдук Ставропольга 14 оҕо II Бүтүн Арассыыйатааҕы бэстибээлгэ кыттыыны ылбыта, Казаньҥа “Бастакылар Ыҥырыылара” бырайыакка – 31 оҕо, Хабаровскайга «Зарница 2.0.» оонньуу уокуруктааҕы түһүмэҕэр – 20 оҕо, Владивостокка “Океан” кииҥҥэ “Бастакылар Туйгуннара” симиэнэҕэ – 24 оҕо кыттыбыттара.

Маны таһынан Бастакылар Хамсааһыннарын көхтөөх чилиэннэрэ “Казаньҥа “Кэлэр кэм пилоттара” бырайыакка, Москваҕа “Устуоруйаны харайааччылар” бырайыак иккис сүлүөтүгэр, Самарскай уобаласка «iВолга» ыччат пуорумугар, Камчатскай кыраайга экологическай пуорум чэрчитинэн ыытыллыбыт “Бастакылар Юннаттара “ сүлүөккэ, Байконурга “Бастакылар космическай эспэдииссийэлэрэ” бырайыакка, Севастопольга “Нэһилиэстибэ” бырайыактыыр оскуолаҕа, о.д.а. эрэгийиэннэргэ сылдьыбыттара, диэн иһитиннэрэр Ил Дархан, бырабыыталыстыба пресс-сулууспата.