Бастрыкин электросамокатынан оҕону түҥнэри көппүттэрин чахчытынан холуобунай дьыаланы тэрийэргэ сорудахтаата

Ааспыт нэдиэлэ бүтүүтэ Дьокуускай куоракка сааһын ситэ илик оҕону электросамокатынан түҥнэри көппүттэрэ. Бу күннэргэ РФ Силиэстийэлиир кэмитиэтин бэрэссэдээтэлэ А.И. Бастрыкин сааһын ситэ илик оҕону кытары сыһыаннаах бу быһылааны болҕомтоҕо ылан, холуобунай дьыаланы тэрийэргэ ыйыы биэрдэ.

Санатар буоллахха, Силиэстийэлиир кэмитиэт иһитиннэрбитинэн, от ыйын 17 күнүгэр 23 саастаах эр киһи электросамокатынан Дьокуускай куорат устун айаннаан иһэн, киһи хаамар сиригэр биэс саастаах уол оҕону түҥнэри көппүт. Кыра оҕо эт-хаан эчэйиитин ылан суһал мэдиссиинэ көмөтө наада буолбут.

Силиэстийэлиир кэмитиэт Саха сиринээҕи салаата бу быһылаанынан бэрэбиэркэ тэрийдэ. РФ Силиэстийэлиир кэмитиэтин бэрэссэдээтэлэ Александр Бастрынкин Силиэстийэлиир кэмитиэт Саха сиринээҕи салаатын салайааччытыгар Виталий Кондратенкоҕа холуобунай дьыаланы тэрийэригэр уонна сэлиэстийэ хаамыытын, түмүгүн дакылааттаан иһэригэр сорудахтаата.

Сорудаҕы толоруу биэдэмэстибэ киин аппараатыгар хонтуруолга ылылынна диэн СК Саха сиринээҕи салаатын пресс-сулууспата иһитиннэрэр.