Бастрыкин Саха сиригэр булчут сүппүт дьыалатын хонтуруолга ылла

Арассыыйа Силиэстийэлиир кэмитиэтин бэрэссэдээтэлэ Александр Бастрыкин Үөһээ Бүлүүгэ эр киһи сүппүтүнэн холуобунай дьыаланы дакылааттыырга ирдээтэ. Бу саас 68 саастаах эр киһи бултуу сылдьан сүппүтэ. Эр киһи сүтээһинэ криминалы кытта сибээстээх буолуон сөп диэн сабаҕалааһын баар.

Арассыыйа Силиэстийэлиир кэмитиэтин информационнай киинигэр Саха сирин олохтооҕо киһи 68 саастаах аҕата сүппүт өрүттэрин кытта сөбүлэспэтин туһунан иһитиннэрбит диэн Силиэстийэлиир кэмитиэт суруйар.

Санатан суруйдахха, ыам ыйын 7 күнүгэр Хоро сэлиэнньэтигэр үс эр киһи бултуу барбыт. Кинилэр эппиттэринэн, үһүс киһилэрэ суолга аара хаалбыт уонна сүппүт. Бастаан бэйэлэрэ көрдүү сатаабыттар, онтон булбаккалар, ыам ыйын 19 күнүгэр дьоҥҥо биллэрбиттэр. Аныгыс күнүгэр быыһааччылар кэлбиттэр. СӨ Быыһыыр сулууспата иһитиннэрбитинэн, сүппүт киһи хоммут сирин булбуттар. Ол эрээри, эр киһи көстүбэтэх. Бэс ыйын 8 күнүгэр сүрүн көрдөөһүн тохтообут.

Силиэстийэлиир кэмитиэт дааннайдарынан, сүппүт киһини кытта бултуу барсыбыт дьонтон биирдэстэрэ эрдэ сууттана сылдьыбыт.

«Эр дьон айдаарсан баран быраабы утары дьайыылары оҥорбут буолуохтарын сөп диэн сабаҕалааһын баар. Тустаах структураларга иһитиннэриилэр туох даҕаны түмүгү аҕалбатахтар», — диэн биэдэмистибэ бэлиэтиир.