Салгыы
Бастыҥ бөрөһүккэ 100 тыһыынча солкуобайы биэриэхтэрэ

Бастыҥ бөрөһүккэ 100 тыһыынча солкуобайы биэриэхтэрэ

26.01.2023, 16:19
Бөлөххө киир:

Бастыҥ бөрөһүт-булчукка Амма улууһун баһылыгын гранын – 100 тыһыынча солкуобайы туттарыахтара. Ону тэҥэ, биир бөрө кутуругар булчуттар 60 тыһыынча солкуобайы ылыахтарын сөп.

Амма улууһун баһылыга Степан Кузьмин бу күннэргэ бөрөнү бултуур булчуттары кытары көрүстэ. Көрсүһүүгэ баһылыгы бастакы солбуйааччы Василий Бураев уонна Амматааҕы судаарыстыбаннай экологическай хонтуруол инспекциятын салайааччы Евгений Егоров кытыннылар. Быйыл туртас аҕыйах буолан, ардай аһыылаахтар сылгыга саба түһэллэрэ элбээтэ диэн инспекция салайааччыта Евгений Егоров этэр.

Бу сыл саҥатыттан бөрөлөр үөрдэрэ нэһилиэнньэлээх пууннарга киириилэрэ элбээтэ. Болугур нэһилиэгэр уонна Эмис нэһилиэгин Олом-Күөл учаастагар сылдьаллара бэлиэтэммитэ. Онон бөрө ахсаанын аҕыйатар туһуттан, биир бөрө иһин улуустан 20 тыһыынча солкуобай төлөнөрүн туһунан боппуруоһу көрүөхпүт. Саамай сүрүнэ, бөрөнү бултуурга лиссиэнсийэ, Амма улууһугар бултаммытын туоһулуур докумуон баар буолуон наада. Онтон сыл бүтүүтэ саамай элбэх бөрөнү өлөрбүт булчукка 100 тыһыынча солкуобай суумалаах баһылык гранын туттарыахпыт, — диэн Степан Кузьмин эттэ.

Тохсунньу саҥатыгар Болугур нэһилиэгэр бөрөлөр 10 сылгыны тардыбыттара. Эмис нэһилиэгин Олом-Күөл учаастагар фермер сылгыларын былдьатан, улахан ороскуоту көрүстэ.

Олом-Күөл учаастагар бөрөлөр сылдьыбыттара хас да сыл буолла. Былырыын 9 сылгыны тардыбыттара уонна 3 сылгыны бааһырдыбыттара. Бу көрсүһүүгэ бөрөһүттэр бары мустан, санаабытын үллэһиннибит уонна салалта этиитин иһиттибит. Бөрөнү бултуур булчуттарга сүрүн кыһалҕабыт – уматык, гөрүүчэй тиийбэтэ буолар. Маны быһаараллара буоллар. Бөрөлөр биир сиргэ өр сылдьыбаттар, улуустарынан кэрийэ сылдьар буолан, чопчу хас бөрө баарын этэр уустук, — диэн булчут Егор Кузьмин кэпсээтэ.

Балаһыанньаны билсээри, Эмис нэһилиэгин баһылыга Прокопий Бубякиҥҥа эрийэ сырыттыбыт.

— Бөрөлөр Олом-Күөл учаастагын буулаабыттара ыраатта. Бу ыраах сытар, үрэх баһа дойду. Болугур, Эмис нэһилиэктэрин икки ардынан сүрдээх киэҥ сир, бөрөлөр бу сиринэн-уотунан ыырданаллар. Олом-Күөлгэ уонча күн буола-буола эргийэн кэлэ тураллар эбит. Тыа хаһаайыстыбатыгар улахан хоромньуну оҥороллорун быһыытынан, анаан бултаһыахха, ахсааннарын аҕыйатыахха наада. Биһиги нэһилиэкпитигэр 2 бөрөһүт-булчут баар, быйыл хас да бөрөнү өлөрдүлэр. Сүрүннээн сылгыны сиэбит сирдэригэр, сиэҥнэрин үрдүгэр хапкаан иитэн, бултууллар. Ол үрдүнэн, быйыл бөрөлөр 5 сылгыны тардыбыттара, өссө 5 сылгы көстө илик.

Биир бөрө кутуругар өрөспүүбүлүкэ 30 тыһыынча солкуобайы, улуус – 20 тыһыынча солкуобайы, нэһилиэк – 10 тыһыынча солкуобайы биэрэр. Онон биир бөрөҕө 60 тыһыынча солкуобайы ылыахха сөп. Бастыҥ булчукка 100 тыһыынча солкуобайдаах баһылык грана баар буолбута эмиэ үчүгэй, булчуттары көҕүлүүр, — диэн Прокопий Петрович санаатын үллэһиннэ.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
19 июня
  • 16°C
  • Ощущается: 15°Влажность: 63% Скорость ветра: 1 м/с

Сообщить об опечатке

Текст, который будет отправлен нашим редакторам: