ААҔААЧЧЫ СУРУГА: Бастыҥ өрүү бастыҥ

Дьокуускай куоракка Бэчээт дьиэтин аттынан ааһан иһэн ырааһын, газон ото мэлдьи охсулларын, үүнэн турар лагласпыт хатыҥнар быыстарын иһэ мэлдьи ырааһын сөҕө көрөбүн.

Дьиҥэ, бу дьиэ аттынан элбэх киһи ааһар, табахтыы олорор дьон даҕаны ыскамыайкаҕа элбэх буолар. Бу дьиэ таһын кыһыннары-сайыннары хаарын күрдьэ, сайынын отун охсо сылдьар киһини наар хайҕыы көрөбүн. Ол биһиги биир дойдулаахпыт, Сунтаардааҕы «Сахателеком» дириэктэрин солбуйааччынан үлэлээбит Григорий Григорьевич Игнатьев буолар.

Билигин кини бочуоттаах сынньалаҥҥа тахсан, куоракка көһөн кэлэн олорор уонна Бэчээт дьиэтигэр вахтаҕа үлэлиир. Урут да, билигин да биһиги бастыҥ үлэһит биир дойдулаахпыт билигин да, быстах үлэтигэр олус эппиэтинэстээхтик сыһыаннаһар. Газон отун мэлдьи үүннэ да охсор, охсуллубут оту мунньан куулга хаалаан илдьэ баралларын курдук чөкөччү уурар.

Ыраас, хомуллуулаах, көрүүлээх дьиэ аттынан ааһар олус күндү. Ол барыта Григорий Григорьевич Игнатьев кыһамньылаах үлэтиттэн тахсар.

Марта Николаева.