Бастыҥ учууталларга наҕараадалар туттарылыннылар

«Уустук уонна сыралаах үлэҕитигэр, үөрэтэр оҕолоргутугар бэриниигит иһин мин эһиэхэ хас биирдиигитигэр махтанабын. Үүнэр көлүөнэни иитэн таһаарыыга кыттыыны ылаҕыт, биһиги инникибитин оҥороҕут. Эһиги төрөөбүт өрөспүүбүлүкэбит, дойдубут сайдыытыгар улахан кылааты киллэрэҕит«, — диэн Ил Дархан киирии тылыгар эттэ.

Ил Дархан 2023 сыл үөрэх эйгэтигэр улахан суолталаах сыл буоларын бэлиэтээтэ. Дойду бэрэсидьиэнэ Владимир Путин бу сылы Учуутал уонна уһуйааччы сылынан биллэрбитэ.

«Бүгүн саалаҕа өрөспүүбүлүкэбит бастыҥ учууталлара, уһуйааччылара муһуннулар. Эһиги  куруук  таһымҥытын, квалификацияҕытын үрдэтэҕит, ону сэргэ үлэҕитигэр саҥа хайысхалары оҥороҕут. Үлэҕитигэр инновационнай саҥалыы көрүүлэри киллэрэҕит, оҕолор интэриэстэрин тардаҕыт, үөрэх сырдык эйгэтигэр угуйаҕыт. Оҕолор тапталлара, итэҕэллэрэ, билиигэ, үөрэххэ тапталлара, уоттаах харахтара — бу буолар туохтааҕар даҕаны үрдүк наҕараада», – диэтэ Айсен Сергеевич.

Ил Дархан учуутал дьиэ кэргэҥҥэ улааппыт буолан, кыра сааһыттан учуутал сыралаах үлэтин, оҕолорго сырдыгы тиэрдэр, билиини биэрэр, олох киэҥ аартыгар бэлэмниир маастарыстыбаларын көрө улааппытын туһунан бэлиэтээтэ.

«Эһиги өрөспүүбүлүкэбит тирэҕэ уонна киэн туттуута буолаҕыт. Эһиэхэ саҥа интэриэһинэй бырайыактары, үөрэххэ баҕалаах үөрэнээччилэри уонна иитиллээчилэри баҕарабын! Дьоллоох буолуҥ, саҥа бырайыактары, былааннары олоххо киллэрэр туһуттан чэгиэн сылдьыҥ. Бары үтүөнү баҕарабын», – диэн  Ил Дархан учууталлары эҕэрдэлээтэ.

• «СӨ  Норуодунай учуутала» бочуоттаах ааты Е.А.Варшавскай аатын сүгэр Нерюнгри куоратын  24-с №-дээх информационнай-технологическай лиссиэй дириэктэрэ Сергей Жилин ылла.
• М.А.Алексеев аатынан СӨ судаарыстыбаннай бириэмийэни Сунтаар улууһун политехническай лиссиэй-интэринээт физика учуутала Римма Алексеева ылла.
• «СӨ Үтүөлээх учуутала» бочуоттаах ааты Татьяна Протодьяконова уонна Галина Шишигина ыллылар.
• «СӨ Үөрэҕин үтүөлээх үлэһиттэрэ» бочуоттаах ааттары Анна Едукина, Ольга Сакал, Валентина Протодьяконова ыллылар.
• «Гражданскай килбиэн» бэлиэлэр  Матрена Аммосоваҕа, Вера Поповаҕа туттарылыннылар.
• СӨ Аҕа баһылыгын грамотата Елена Болдинаҕа, Марианна Григорьеваҕа туттарылыннылар.
  

Судаарыстыбаннай наҕараадалары сэргэ  Айсен Николаев бастыҥ учууталларга Учуутал уонна уһуйааччы сылын чэрчитинэн, өрөспүүбүлүкэ Аҕа баһылыгын бириэмийэлэрин туттартаата.