Хаартыскаҕа Андрей Сорокин түһэриитэ, СИА
Учуутал күнүн көрсө, алтынньы 4 күнүгэр, Ил Дархан Айсен Николаев бастыҥ уһуйааччы-педагогтарга судаарыстыбаннай наҕараадалары туттарда. Аһаҕас куоластааһын түмүгүнэн 36 киһи бириэмийэни ылла.
Ил Дархан өрөспүүбүлүкэ сайдыытыгар үөрэх үлэһиттэрин сүдү кылааттарын бэлиэтээтэ, үүнэр көлүөнэни иитиигэ кинилэр оруолларын тоһоҕолоон эттэ.
«Бүгүн бу саалаҕа үлэлэригэр үрдүк ситиһиилээхтэр муһуннулар. Эһиги хас биирдиигит Арассыыйа үөрэҕириитин бастыҥ үгэстэрин тутуһар. Хас биирдиигит билиини-көрүүнү тиэрдэр, үтүө сыаннастары сырдатар ураты күүстээх. Бу уустук кэмҥэ, ити ордук улахан суолталаах. Эһиги оҕолорго бары өттүнэн сайдыылаах, көмүскэллээх буолалларыгар кыһамньыгытын уураҕыт», — диэтэ Айсен Николаев.
Бастыҥ уһуйааччы-педагогтар ортолоругар — Мииринэй улууһуттан Удачнайтан 24 №-дээх оскуола нуучча тылыгар уонна литературатыгар учуутала Виктория Смыслова баар.
«Учууталлар үлэлэрин сыаналаабыккытыгар улаханнык долгуйан, үөрэн туран ис сүрэхпиттэн махтанабын. Уһуйааччы — бу идэтин баһылаабыт үтүө майгылаах, истиҥ санаалаах педагог. Саамай сүрүнэ, кини үлэтин саҥа саҕалаан эрэр педагогтары кытта үөрүйэҕин атастаһарга бэлэм буолар», — диэтэ кини.
Бириэмийэни ылбыттар ортолоругар, Муома улууһуттан Н.С.Тарабукин аатынан Улахан Чыыстай орто оскуолатын алын сүһүөх кылааска учуутала Алена Афанасьева баар:
«Маннык үрдүк наҕаараадаҕа тиксибиппиттэн улаханнык үөрдүм. Выпускниктарбар, үөрэнээччилэрбэр, кэллиэгэлэрбэр уонна миэхэ куоластаабыт дьоҥҥо барыларыгар махтанабын. Мин 1986 сыллаахтан үөрэммит оскуолабар учууталлыы сылдьабын. Тэриллибитэ 110 сылын туолбут Дьокуускайдааҕы 1 №-дээх педагогическай училищены бүтэрбитим. Биһиги дьиэ кэргэммитигэр уон киһиттэн алтата учууталбыт. Аҕабыт Николай Кириллович Черемкин суолун батыстыбыт. Оскуолабытыгар эдэр педагогтары кытта үлэ ыытыллар, үрдүкү кылаас үөрэнээччилэригэр идэни таларга үлэ тиһиктээхтик салҕанар. Хоту эдэр учууталлар үлэлии кэлиэхтэрин баҕарабыт. Биһиги кэлэктииппит наһаа иллээх», — диэн эттэ.
Маны сэргэ, бу күн Ил Дархан Михаил Андреевич Алексеев аатынан бириэмийэни, «СӨ үтүөлээх учуутала» уонна «СӨ үөрэҕириитин үтүөлээх үлэһитэ» бочуоттаах ааттары, СӨ Ил Дарханын кырааматаларын туттарда.
Санатар буоллахха, бастыҥ уһуйааччы-педагогтарга наҕараада 2023 сыллаахха, РФ Педагог уонна уһуйааччы сылыгар, олохтоммута. Күөн күрэс иккис сылын ыытылынна. Быйыл уопсастыбаннай куоластааһыҥҥа өрөспүүбүлүкэ араас муннугуттан уопсайа 120 учуутал кыттыбыта бэлиэтэнэр.
СӨ Ил Дарханын уонна Бырабыыталыстыбатын пресс-сулууспата
Хаартыскаҕа Андрей Сорокин түһэриитэ, СИА
Ааспыт нэдиэлэ устата Дьокуускай куорат мээрийэтин административнай хамыыһыйата сымыйа кафеҕа, түүҥҥү кулуупка уонна итирдэр утахтары…
Соторутааҕыта тахсыбыт “Саха култууратын тиэрминнэрин нууччалыы-сахалыы, сахалыы-нууччалыы тылдьыта” дьоҥҥо-сэргэҕэ бэрт туһалаах буолсу. Аныгы курдук хас…
Чуапчы улууһун Соловьев нэһилиэгин баһылыгын боломуочуйатын болдьоҕун иннинэ тохтотор туһунан суут быһаарыыта күүһүгэр киирдэ. Чурапчы…
Офтальмология өрөспүүбүлүкэтээҕи балыыһатын мобильнай быраастара ыраах сытар нэһилиэнньэлээх пууннарга, ол иһигэр Арктика улуустарыгар, харахха эпэрээссийэлэри…
Бүгүн күнүс улуус киинин Амманы уонна Чакыр нэһилиэгин бэйэ-бэйэлэриттэн "арааран" турар Амма өрүс биир кытыллыттан…
Саха сиринээҕи Суут бириистэптэрин управлениетын Дьокуускай куораттааҕы салаата кирэдьиит төлөбүрүн төннөрөр туһунан дьыаланы түмүктээтэ. Дьокуускай…