Баттах маҥхайыытын хайдах бытаардабыт?

Кэлиҥҥи кэмҥэ  баттах эрдэ маҥхайыыта олус дэлэйдэ. Урукку өттүгэр дьахтар 50 сааһын, оттон эр дьон 60 саастарын аастахтарына, чанчыктара туртайан, дьахталларга маҥан сүүмэхтэр көстүтэлиир буолаллара. Билигин 30 сааһын ааспыт  эдэр дьон баттахтара маҥхайарын үгүстүк бэлиэтии көрөбүн. Биир өттүнэн, туох барыта сайдан, дьон кырдьыбат буолла дииллэр, ол эрээри маҥан баттах кырдьыы бэлиэтэ буолбатах дуо?

Төрүөтэ?

Баттах өҥүн тутар меланин киһи куйахатын фолликулларыгар үөскүүр. Өскөтүн, бу меланин аччаатаҕына, маҥан сүүмэхтэр элбээн бараллар. Учуонайдар быһааралларынан, хара баттахтаах дьоҥҥо меланин элбэх эбит. Ол эрээри кинилэр баттахтара сырдык баттахтаах дьоннооҕор эрдэ маҥхайар. Меланин туохтан аччыырый? Сүрүн төрүөтэ – доруобуйаҕа, ис уорганнарга кэһиллии баарын туоһута. Ону сэргэ, куртах, оһоҕос мөлтөхтүк буһарар, анемия­лаах уонна хаан эргиирэ мөлтөхтүк үлэлиир дьоно баттахтара эрдэ маҥхайар. Маны таһынан, табахтыыр, аһары элбэх чэйи, кофены иһэр дьон эмиэ бу кыһалҕаҕа ылларыахтарын сөп. Киһи күннээҕи рационугар эт, сымыыт, балык ха­­йаан да баар буолуохтаах. Эккэ, балык­ка баар тирозин диэн кислота меланин үөскүүрүгэр көмөлөһөр. Онон киһи элбэх белоктаах аһылыгы аһыахтаах. Медь, хром, цинк уонна фолиевай кислота тиийбэтиттэн баттах маҥхайыыта түргэтиир.

СҮБЭ

Дьокуускай куорат, «Лето» солуон:

– Биһиэхэ трихолог быраас урут баара. Билигин суох. Ол эрээри трихолог быраас сүбэтинэн биһиги солуоммутугар плазмолифтинг оҥорторуохха сөп, биир өҥөтө 6000 тыһ. солк. Баттах хойдорун, тупсарын туһугар биэстэ-алтата бу өҥөнөн туһаныахха наада. Киһи-киһи баттаҕын туруга араас, онон трихолог быраас сүбэтинэн оҥорторор наада.  Дьокуускайга тирии бааһын быһаарар балыыһаҕа (КВД) уонна «Косметон» солуоҥ­ҥа трихолог-быраастар үлэлииллэр.

Тохтотуохха сөп!

Ханнык да бородууктаны сиэн киһи меланины таһыттан ылар кыаҕа суох. Ол эрээри меланин үөскүүрүн күүһүрдэн, баттах маҥхайыытын тохто­туохха сөп.  Ол курдук, саамай киэҥник биллэр лазотерапия, плазмолифтинг, мезотерапия курдук солуоҥҥа оҥоһуллар өҥөлөр улахан көмөлөөхтөр диэн исписэлиистэр бэлиэ­тииллэр. Биһиэхэ, Саха сиригэр, плазмолифтинг өҥөтүн хото оҥороллор. Тымыртан хаан ылан баран, плазмаҕа кубулуталлар уонна куйаханы укуоллууллар. Бу арыый да сыаналаах өҥөнү үгүстүк кэрэ аҥаардар оҥортороллор. Оттон эр дьон айылҕа биэрбитинэн сылдьартан улаханнык кыбыс­тыбаттар. Маны таһынан, баттах өҥүн тупсарарга, хойуу уонна доруобай көрүҥнээх буоларын туһугар араас битэмииннээх сывороткалары, мааскалары нэдиэлэҕэ биирдэ-иккитэ туттар олус наада. Киһи куруук биир суунар тэрилинэн туттара тутах. Баттах биир көрүҥ шампуҥҥа начаас үөрэнэр. Ол иһин үс-түөрт шампуну хардары-­таары уларыта сылдьан туттар олус туһалаах.

Тугунан тараанаҕын?

Былыр-былыргыттан та­­раах дьахтарга улахан суолталаах. Дьиҥнээх, (натуральнай) хатыылаах суокканан тарааныыны трихолог быраастар сүбэлииллэр. Быласымаас та­­раах баттахха куһаҕаннык дьайар эбит. Хатыылаах суокка киһи куйахатын сымнаҕас­тык массаастыыр, хаан эргии­рин түргэтэтэр. Трихологтар кыратык маҥхайбыт баттаҕы кырааскалатары утараллар.Тоҕо диэтэххэ, билиҥҥи хлордаах ууга, химикаттаах сомпууҥҥа  кырааска начаас суураллар, кэлэр ыйга эмиэ кырааскалатыы кыһалҕата тахсар. Онон баттаҕыҥ маҥана аҕы­йах буоллаҕына, өҥүн уларытарга ыксыыр наадата суох. Маҥан баттах үүнүүтүн тохтотуон баҕарар киһи доруобуйатын бүтүннүү көрдөрүнэрэ наада. Манна сүрүн оруолу эндокринолог быраас ылар. Ону сэргэ, аһылыгы көрүнүү, элбэхтик хамсаныы, салгыҥҥа сылдьыы уонна саас, күһүн битэмиин комплексын иһии улахан суол­талаах.

Кутталыттан баттаҕа маҥхайбыт

Кутталыттан баттаҕа маҥхайбыт диэн этии орун­наах. Элбэхтик санааҕа ылларар, олоҕу уустугурдар, кыра кыһалҕаны таһаҕас оҥостор киһи баттаҕа эмиэ тэҥҥэ кырдьан барар эбит. Ол эбэтэр, киһи санааҕа ыллардаҕына, уйулҕата хамсаатаҕына, стресс гормоннара тахсаллар. Баттах фолликулун аһылыга тохтоон хаалар эбит. Сальнай железалар үлэлэрэ ыһыллар. Ол түмүгэр баттах сүүмэхтэрэ тостумтуо буолаллар, түһэрэ да эл­­биир. Биллэ убуур, өҥө-дьүһүнэ өлбөөдүйэр. Өскөтүн, ый ахсын маҥан баттах аҕыйыахтааҕар элбиир буоллаҕына,  щитовиднай железа туругун көрдөрүнэр наада. Ону таһынан, куртах, оһоҕос бэрэбиэркэтин ааһар хайаан да наада.

Мелатонин утуйар ууну кытта сибээһэ

Мелатонин утуйар уу гормонуттан үөскүүр. Ол эбэтэр, уутун ханан, сынньанан турар киһи баттаҕын маҥхайыыта эмиэ аччыыр. Ханнык битэмииннэр наадаларый? Баттах хойуу, хара уонна доруобай, кылабачыгас көрүҥнээх буолуутун туһугар В бөлөх, А, Д, Е битэмииннэр киһи рационугар күннэтэ наадалар Ол курдук, битэмииҥҥэ битэмиин барыта баар курдук суруллубут да буоллаҕына, быраастар сүбэлииллэринэн, Д уонна С, В бөлөх битэмииннэрин эбии атыылаһан иһэр наада. Маны таһынан, кальций тиийбэтиттэн киһи тыҥыраҕа, баттаҕа барыта мөлтүүр.

Арыы туһата

Өскөтүн, баттаҕыҥ хас сууннаҕын ахсын ытыс муҥунан түһэр, маҥан баттах аҕыйыахтааҕар элбиир буоллаҕына, дьиэ усулуобуйатыгар эмтэнии туһаны аҕалбат. Суһаллык трихолог бырааска суруйтарар ордук диэн сүбэлииллэр. Баттах туохтан түһэрин кини трихограмма нөҥүө быһаарыан сөп. Трихолог өҥөтүгэр үгүстүк тараҕай буолан эр дьон ыксаан суруйтарар эбит. Маны андрогеннай алопеция дииллэр. Дьиҥэр, эр киһи тараҕайдааһына кини 14 сааһыттан саҕаланар эбит. Ол эрээри, үгүс киһи маны өйдөөн көрбөт. Кыһалҕаны төрдүттэн бы­­һаарар, эмтиир туһуттан тустаах исписэлиискэ суруйтаран сү­­бэлэтэр хаһан баҕарар туһалаах. Коронавирус дьаҥын кэнниттэн үгүс киһи баттаҕа мөлтөөбүтүн туһунан суруйар. Ыарахан ыарыыны аһарыныы кэнниттэн баттах түһүүтүн токсическай алопеция диэн ааттыыллар. Баттаҕын харыстыыр киһи саахары сиирин аччатыахтаах. Биотин, селен кини күннээҕи ра­­ционугар баар буолуохтаах. Кыраттан кыыһырыа, санаарҕыа суохтаах. Баттаҕы суунан баран сотторунан эринэн сылдьары, күн ахсын сылаас фенынан куурдары тохтотуох­таах. Маны сэргэ туһалаах арыылар (касторовай, облепиховай) арыыларынан куйаханы массаастанар туһалааҕын бэлиэтииллэр. Сыалаах-арыылаах баттахтаах киһи арыынан хойуутук бистибэт, тарбах төбөтүнэн куйахатын аҕыйах туочукатын нэдиэлэҕэ биирдэ массаастыан сөп. Аҕыйах ыйынан баттаххыт хойуутук үүнэн, кылабачыйан үөрдүөҕэ.

Хаартыска: HTTPS://PXHERE.COM/RU/ саайтан