Оҕо баттах туттарары ыйыстыбыт

Мэҥэ Хаҥалас улууһун быраастара түөрт саастаах оҕо баттах туттарары (заколканы) ыйыстыбытын быыһаатылар.

Оҕо тугу эмэ ыйыстан кэбистэҕинэ хайдах гынабыт? Итинник төһө элбэхтэ буоларый? Бу туһунан Мэҥэ Хаҥалас улуустааҕы киин балыыһатын кылаабынай бырааһа, эндоскопист, үрдүк квалификациялаах быраас Павлов Иннокентий Егорович «Эркээйи» хаһыакка кэпсээбит. Ол туһунан бу курдук суруйаллар.

—Туора эттиги ыйыстыы — бу киһи олоҕор да, доруобуйатыгар да олус кутталлаах. Быраас сыныйан көрүүтэ, сүбэтэ эрэйиллэр. Үксүн балыыһаҕа суһал мэдиссиинэ көмөтө наада буолар. Ордук кыра оҕолор кутталлаахтар, алта ыйдарыттан үстэригэр диэри.

Төрөппүттэр, быһа холоон, 50% оҕо тугу эрэ ыйыстыбытын хас да күн буолан баран билэллэр. Оҕо тахсан киирдэҕинэ онно атын эттиги көрөн баран, сороҕор төрүт да билбэккэ хаалыахтарын сөп. Арыый улахан оҕолор бэйэлэрэ этэллэр, оттон кырачааннарга төрөппүттэр болҕомтолоро ирдэнэр.

Ордук бытархай харчыны, кыра хаптаҕай батарыайканы ыйыстыбыт буолааччылар. Оннук кыра батарыайа куртаҕы курдары да сиэн кэбиһиэн сөп.

Оҕо тугу эрэ ыйыстыбыт буоллаҕына тугу гыныахха?

-«Суһал көмөнү» сонно ыҥырыахха, мэдиссиинэ көмөтүн көрдүөххэ.

Быраас кэлиэр диэри тугу гыныа суохтааххыный?

Оҕоҕо уу, ас биэриэ суохтааххын. Ыйыстыбыт эттигэ тыынар уорганыгар тиийиэн сөп.

Тарбаххытынан эбэтэр тугунан эмэ бэйэҕит хостуу сатаамаҥ, оннук гынан тыынар уорганыгар ыытан кэбиһиэххитин сөп эбэтэр оҕо күөмэйин (куолайын) эчэтиэххитин сөп.

Оҕону хотуолата сатаамаҥ.

Клизма оҥоро, тахсан киирэргэ көмөлөһөр эми-тому иһэрдэ сатаамаҥ.

Оҕо айаҕар ону-маны уктубатын, ыйыстан кэбиспэтин курдук тугу гыныахха?

Оҕо улахан эрэ оонньуурдарынан оонньуурун курдук эрдэттэн болҕомтону ууруохха наада. Оттон ол-бу бытархайдары оҕо тиийбэт сиригэр ууруҥ.

Оҕолорго батарейкалары, маҕаньыыттары туттарымаҥ.

Оҕо остуолга аһыы олордоҕуна ону-маны кэпсэтиннэримэҥ, саҥардымаҥ, бытааннык аһыырга уонна аһын-үөлүн үчүгэйдик ыстыырга үөрэтиҥ.

Оҕону туох сиэниллэригэр уонна сиэниллибэтигэр үөрэтэр ордук.

Сиһилии: #mkang_crb @gazetaerkeii @minzdrav_sakha манна киирэн көрүҥ.