Хаартыска Матрена Бочкарева тиксэриитэ
Арассыыйаҕа — Дьиэ кэргэн, өрөспүүбүлүкэҕэ – Оҕо, Уус Алдаҥҥа — Аҕа, Дүпсүҥҥэ — Эр хоһуун сылларынан «Дьиэ кэргэн — олох төрдө» тэрээһин ыытылынна.
Тэрээһини Бээдитээҕи «Туллукчаан» оҕо саадын иитиллээччилэрэ уонна Бээди сүрүн оскуолатын оҕолоро ырыанан, үҥкүүнэн киэргэттилэр. Оҕолорго «Дьоллоох оҕо саас» уруһуй күрэхтэһиитэ буолла, кинигэнэн, хаартысканан быыстапка тэрилиннэ. Ол кэнниттэн дьиэ кэргэттэр биэс түһүмэхтээх күрэскэ күөн көрүстүлэр. Түмүккэ 4 оҕолоох Анна, Иван Копыриннар дьиэ кэргэттэрэ кыайыылааҕынан тахсан олохтоох дьаһалта баһылыгын аатыттан Н.Н. Сивцевтэн анал бириис туттулар. Иккис миэстэни 4 оҕолоох Ирина, Эдуард Тордуяновтар «Куруку» култуура, успуорт комплексын бирииһин, үһүс миэстэни Наталья, Николай Домотовтар Бээди сүрүн оскуолатын олохтообут бирииһин туттулар.
Култуура, сынньалаҥ киинин дириэктэрэ, СӨ култууратын туйгуна Бочкарева Матрена Захаровна иһитиннэрбитинэн, Бээдигэ үлэ-хамнас күөстүү оргуйар. Ол курдук, киинтэн ыраах сытар бөһүөлэктэри сайыннарыы уонна үбүлээһин бырагырааматын тирэх оҥостон, олохтоохтор туруорсууларынан былырыын искибиэр үлэҕэ киирбитэ, биэлсэр-акушер пууна быйыл үлэҕэ киириэхтээх. Олохтоохтор улуус баһылыгар туруорсаннар, саҥа уһуйаан тутуутугар, КСК өрөмүөнүгэр үп-харчы көрүллэрэ ситиһиллибит.
Манна даҕатан эттэххэ, бээдилэр успуорка үчүгэйдэр. Ол туһунан соторутааҕыта суруйан турарбын. Итинтэн сиэттэрэн эттэхпинэ, аҕыйах хонугунан 11-с төгүлүн волейболга күрэхтэһии ыытыллаары турар.
-Дүпсүнтэн төһө да тэйиччи олордорбут, биир нэһилиэк буоларбыт быһыытынан, араас тэрээһиннэргэ хардарыта көмөлөсүһэбит. Ол курдук, аны күһүн нэһилиэкпит сынньалаҥын киинин үбүлүөйүн тэрээһинэ, ону таһынан сопхуос уонна космонавтика музейын үбүлүөйдэрэ ыытыллыахтара. Ол тэрээһинигэр барытыгар биһиги, бөһүөлэк олохтоохторо, эмиэ кыттыыны ылабыт. Кулун тутар ыйга улууспутугар сылын аайы ыытыллар нэһилиэктэр бэстибээллэрэ буолуохтаах. Онон нэһилиэкпитигэр үлэ күөстүү оргуйар, — диэн Матрена Захаровна сонунун түмүктүүр.
Дойдум, төрөөбүт төрүт түөлбэм Бээди үүнэ-сайда турарын истэн, билэн санаам көтөҕүллэр. Бу барыта дьон туһугар.
Иван Сивцев — Бээди
Хаартыска Матрена Бочкарева тиксэриитэ
Элбэх оҕолоох ыалларга анал бырагыраама баар буолан, олорор дьиэлэрин сыанатын толуйарга үп-харчы көрүллэр. Ипотеканы төлөөһүҥҥэ…
Бүгүн, бэс ыйын 1 күнүгэр, П.А.Ойуунускай аатынан Саха Академическай тыйаатырыгар бойобуой дьайыы бэтэрээннэрин күнүн бэлиэтээһинэ…
Ааспыт нэдиэлэ устата түөкүттэр буруйу оҥорор дьайыыларыттан өрөспүүбүлүкэ 15 олохтооҕо эмсэҕэлээтэ, кинилэртэн албыннатан былдьаппыт харчыларын…
Өрөспүүбүлүкэ киин куоратын уулуссаларыгар «дрифтээбит» 27 саастаах Дьокуускай олохтооҕо холуобунай дьыалатыгар бириигэбэрэ таҕыста. Кини РФ…
2023 сыллаахха сэтинньи 23 күнүгэр Ил Дархан Айсен Николаев өрөспүүбүлүкэ олоҥхоһуттарыгар, оһуохайдьыттарыгар уонна тимир уустарыгар…
Оройуоннааҕы борокуратууралар ирдэбиллэринэн, Саха сиригэр элбэх кыбартыыралаах дьиэлэргэ эрэгийиэн операторыгар өрөмүөн үлэтин ыытарга эбээһинэстиир туһунан…