Хаартыска М.Бочкарева тиксэриитэ
Түгэнигэр сөп түбэһиннэрэн ахтан аастахха, былыр өбүгэлэрбит тутта сылдьыбыт малларын уонна үгэстэрин сөргүтүү үгэскэ кубулуйда.
Холобур биһиги оҕо сылдьан, 60-с сыллардаахха, талахтан ох саа оҥостон оонньуур этибит уонна сыал ытарга күрэхтэһэр буоларбыт. Онно сэргэстэһэ олорор ыалбыт уола Петр Жирков диэн барыга дьоҕурдаах табаарыспыт баһылаан-көһүлээн биһигини илдьэ сылдьара. Өссө эһэм оҕонньор булка туттар айалара хоспохпутугар хараллан тураллара, ону сэрэнэ-сэрбэнэ тарыйан көрөрбүн, сөҕөрбһн-махтайарбын, ис сүрэхпиттэн астынарбын, киэн туттарбын өйдүүбүн.
Дьэ, билигин ону сөргүтүүгэ, үйэтитиигэ өрөспүүбүлүкэ үрдүнэн үлэ көхтөөхтүк барар. Ол биир туоһутунан мин дойдубар, Бээдигэ, ох саанан ытыыга күрэхтэһии буолан ааста. Күрэхтэһии туһунан сонуну олохтоох култуура, сынньалаҥ киинин дириэктэрэ, СӨ култууратын туйгуна Матрена Захаровна Бочкарева иһитиннэрдэ. Күөйэ түһэн эттэхпинэ, бөһүөлэккэ ыытыллар араас хайысхалаах, элбэх ахсааннаах тэрээһиннэр кинитэ суох барбаттар.
— Бээдигэ Улуу Кыайыы 80 сылын көрсө сонун күрэхтэһии бэркэ табыллан, үгүс кыттааччылаах буолла. Эдэрдиин, кырдьаҕастыын, сатыырдыын, сатаабаттыын бары кэлэн көхтөөхтүк кытыннылар, бэйэлэрин холоннулар. Онон 25 киһи күөн көрүстэ. Кылаабынай судьуйанан улуустааҕы, өрөспүүбүлүкэтээҕи ох саанан ытыыга күрэс кыайыылааҕа, призера, Мындаабаттан Иннокентий Иннокентьевич Гоголев кэлэн үлэлээтэ. Иннокентий Иннокентьевич маастар-кылаас бэртээхэйин ыытта. Ох саанан ытыы быраабылатын билиһиннэрдэ, хайдах ытарга үөрэттэ. Бары сонурҕаатыбыт, сэҥээрдибит, былдьасыһа-тарысыһа үөрэннибит даҕаны. Билэргэ-көрөргө, сатыырга кыахпыт баарынан кыһалла сатаатыбыт.
Онон бэртээхэй күрэс ыытылынна. Ол түмүгүнэн эр дьоҥҥо кыайыылаахтар быһаарылыннылар:
1 миэстэни Антон Алексеев ылла. Иккис бочуоттаах миэстэҕэ Эрсан Соловьев таҕыста. Үһүс бириистээх миэстэни Вячеслав Жирков ылла.
Дьахталларга да киирсии бэртээхэй буолла. Ол курдук, илин-кэлин түсүһүү кэнниттэн:
1 миэстэҕэ Маргарита Алексеева тахсан үөрүү-көтүү буолла. Иккиһи Аммосова Анита ылла. Үһүскэ Октябрина Алексеева таҕыста.
Түгэнинэн туһанан бэлиэтээтэххэ, 2024 сылга нэһилиэккэ ох саанан ытыы киэҥник сайдарыгар анаан олохтоох дьаһалта, баһылык Сивцев Николай Николаевич ох саа тэрилин атыылаһан улахан көмөнү оҥордо. Онон бу күрэс ыытылынна. Ону тэҥэ, улуустааҕы ох саанан ытыы федерациятын бэрэссэдээтэлэ Ольга Анатольевна Попова эбии малы-салы, тэрили уларсан көмөлөспүтүгэр, Иннокентий Иннокентьевичка кэлэн күрэхтэһиибитин ыытарга күүс-көмө буолбутугар тэрийээччилэр, күрэхтэһии кыттыылаахтарын ааттарыттан улахан махталбытын тиэрдэбит. Инникитин ох саанан ытыыга интэриэһи үрдэтэн, элбэхтик дьарыктанан, быраабыланы билэн бары кыһамньыбытын ууруохпут диэн бэлиэтээтибит. Мантан сиэттэрэн быйыл ыһыахха ох саанан ытыы күрэхтэһиитин киллэрэргэ былааннанныбыт. Онон нэһилиэкпитигэр ох саанан ытыы сайдарыгар эрэнэбит. Уонна тулуурдаах, дьулуурдаах спортсменнар үүнэн, сайдан тахсалларыгар баҕарабыт, — диэтэ Матрена Захаровна.
Иван Сивцев-Бээди.
Хаартыскалар М.Бочкарева тиксэриилэрэ
Чукотка автономнай уокуругар Баимскайдааҕы хайа байытар кэмбинээтин тутуу саҕаланна. Баимскайдааҕы ГОК тутуутун хаамыытын РФ Бырабыыталыстыбатын…
Күн оройо буола оҕуста. Сотору кэминэн улахан оҕолоро оскуолаттан кэлиэхтэрэ. Аҕалара эбиэттии кэлиэ. Бэйи эрэ,…
Ил Дархан Айсен Николаев Аҕа дойду Улуу сэриитин кыттыылааҕар Николай Иванович Афанасьевка "Саха Өрөспүүбүлүкэтин бочуоттаах…
Улуу Кыайыы өрөгөйдөөх күнүгэр Ийэ дойдуларын көҥүлүн күөннэринэн хаххалаан көмүскээбит, итии хааннарын тохпут буойун суруналыыстар…
Бүгүн, муус устар 19 күнүгэр, сарсыарда Уус Алдан улууһун Балыктаах сэлиэнньэтигэр Васильев уулуссатыгар дьиэ умайа…
П.Чайковскай аатырбыт муусукатыгар «Щелкунчик» балеты дьиэ кэргэнинэн сөбүлээн көрөллөр. Оҕолор бу остуоруйа судургу сюжетын ордороллор.…