Бээдилэр сонуннара

Уус Алдан улууһугар Бээдигэ «Алгыс» диэн бэтэрээннэр түмсүүлэрэ баар. Бу түмсүү бэрэссэдээтэлэ Евдокия Захаровна Шергина иһитиннэрбитинэн, быйыл саҥа үүммүт сыллара сонуннук саҕаламмыт.

Ол курдук, Өнөр нэһилиэгин түмсүүтэ тэрийбит Эргэ Саҥа дьыллааҕы тэрээһинигэр сылдьаннар, саастаах дьон астына-дуоһуйа сынньаммыттар, сэргэхсийбиттэр. Бу тэрээһиҥҥэ чугас сытар нэһилиэктэр түмсүүлэрэ: Тулунаттан, Уһун Күөлтэн, Өнөртөн түмсэн кыттыбыттар. Дьоро тэрээһиҥҥэ бириистээх оонньуулары оонньоппуттар, билиини-көрүүнү тургутар күрэс ыытыллыбыт, ырыа ылламмыт, тойук туойуллубут.

Истиҥ-иһирэх көрсүһүүгэ кыттыбыттар Өнөр нэһилиэгин бэтэрээннэрин түмсүүлэрин бэрэссэдээтэлигэр махтаналлар. Маннык тэрээһин  өссө да салҕана турарыгар баҕараллар диэн кэпсиир Евдокия Захаровна.

Дойдум дьоно сайдыыны кытары тэҥҥэ хаамсан иһэллэрэ, туһалаах тэрээһиннэри тэрийэллэрэ, кытталлара үөрдэр.

Иван Сивцев-Бээди.

Хаартыскалар: Евдокия Шергина тиксэриилэрэ