Бөөлүүн Өймөкөөҥҥө 50 кыраадыс тымныйда

Сэтинньи 14 күнэ үүнэр түүнүгүэр Өймөкөөҥҥө -50 кыраадыс тымныйда, сарсыарда салгын тымныытын-итиитин мээрэйдиир тэрил -48 кыраадыһы көрдөрдө. Өймөкөөҥҥө бу кэмҥэ бытарҕан тымныылар түһээччилэр. Ол эрээри, күнү-дьылы билгэлиир саайтарга көрдөххө, онно кэлэр нэдиэлэттэн сылыйар, хаардыыр.

Оттон өрөспүүбүлүкэ киин куоратыгар бу нэдиэлэҕэ сылаас буолар, онтон кэлэр нэдиэлэттэн, сэтинньи 20-с күннэриттэн саҕалаан,  -25-30 кыраадыстаах тымныылар түһэллэр диэн күнү-дьылы билгэлиир саайтар көрдөрөллөр. Быйыл сэтинньибит сылаас буолла, куба түүтэ ньуолах хаарынан күндүлээтэ.

Бу күннэргэ күүстээх магнитнай буурҕа түспэт, күн эстиитэ мөлтөх. Сэтинньи 14 күнүгэр 3 бааллаах, онтон кэлэр күннэргэ 1-2 бааллаах буолар. 4-5 баалтан саҕалаан, магнитнай буурҕа дэнэр.