Бээтинсэҕэ түүн тоҥоруу түһэрэ сабаҕаланар

Бээтинсэҕэ, балаҕан ыйын 5 күнүгэр, түүн тоҥоруу түһэрэ сабалаҕанар диэн Саха сиринээҕи УГМС саайта сэрэтэр. Халлаан халлар түгэнигэр киин уонна Бүлүү бөлөх улуустарыгар, ону таһынан Дьокуускай куорат тулатыгар салгын температурата 0…-2 кыраадыска диэри түһүөҕэ.

Бээтинсэҕэ синоптиктар Мииринэй, Сунтаар, Өлүөхүмэ, Ленскэй, Алдан, Нерюнгри улуустарыгар кыралаан ардыырын, сорох сиринэн самыыр түһэрин сабаҕалыыллар.

Арктика улуустарыгар түүн инчэҕэй хаар түһэрэ күүтүллэр. Атын улуустарынан сөҥүүтэ суох буолуоҕа. Күнүс киин улуустарга салгын температурата +15…+20, арҕаа, хотугулуу-арҕаа +12…+17, Арктика кытылыгар +7…+12 кыраадыс сылаас буолуоҕа.

Дьокуускайга түүн +3…+5 кыраадыс буолуо, оттон куорат таһыгар 0…-2 диэри тоҥоруо. Күнүс салгын температурата +19…+21 кыраадыска диэри сылыйыа диэн сабаҕалыыллар.