«Бөҕө. Бигэ. Барҕа»— өлөртөн өрүһүйбүт харысхал тыллар

Тохсунньу 23 күнүгэр  «Аҕа дойдуну көмүскээччилэр»  пуонда салаатыгар «Стойкость куется на Севере» уонна «Биһигини умнаайаҕыт» диэн кинигэлэр сүрэхтэниилэрэ буолла.

Бу кинигэҕэ киирбит ааптардартан биирдэстэрэ, »Хабар» диэн ыҥырыллар ааттаах Петр Хабаров «Бигэ. Бөҕө. Барҕа»‘ диэн кэпсээнин хайдах суруйбутун кэпсээтэ:

— Мин Муомаҕа элбэх оҕолоох дьиэ кэргэҥҥэ төрөөбүтүм. Байыаннай дьайыы саҕаламмытын биллэрэллэрин кытта, биир бастакынан тылланан барбытым. Чахчы патриоттар этибит, төлөбүр төлөнөрүн да билбэт этим. Быраас идэлээх этим, ол эрээри »передокка» бараары, ону кистээбитим. Фроҥҥа араас буолара.
Умнубат туһуттан, госпитальга иллэҥсийбиччэ, сурунан бэлиэтэнэр этим. Манна кэлбитим кэннэ, ахтыы суруйарбар көрдөспүттэрэ, онуоха саамай өйдөнөр түгэннэри суруйбутум.

»Бөҕө. Бигэ. Барҕа» диэн тыллары кэргэним миэхэ харысхал быһыытынан эппитэ. »Ыарахан кэмҥэр ити үс тылы этээр, эйигин харыстыахтара» диэбитэ. Бааһырбыт доҕорбун, нуучча уолун, миинэлээх хонууттан таһаарыам иннинэ, ити үс тылы киниэхэ эмиэ этиттэрбитим. «Бу үс харысхал тыл эйигин быыһыаҕа», — диэбитим. Биһигини бултаһар »дроннар» буулдьаларын, кыранааталарын аннынан, 16 чааһы быһа бэрт эрэйинэн миинэлээх хонууну туораабыппыт. Ол туһунан кэпсээн суруйбутум, — диэн кэпсээтэ.

Ангелина Васильева.
Ааптар түһэриилэрэ.