Бөҕү-саҕы аһыылларын көрөн хараастабын…

Дьокуускайга куоракка бэйдиэ сылдьар ыттары ааһан аны сылгылар куорат устун бэйдиэ сылдьаллар. Айылҕа оҕото диэн ааттыыр сылгыларбыт куорат бөхтөөх баахтарын кэрийэллэр. Ыттан итэҕэһэ суох бөҕү-саҕы ыһаллар, тэпсэллэр. Дьөһөгөй оҕото бөҕү-саҕы аһыы сылдьарын көрөн киһи хараастар. Сатаан ииппэт, көрбөт-истибэт буоллахтарына, тоҕо да кыылы сордууллара буолла…

Дьокуускай куорат дьаһалтатын тыа хаһаайыстыбатын управлениетыгар иһитиннэрбиттэринэн, кулун тутарга куорат иһиттэн уопсайа 28 сылгыны үүрбүттэр. Балартан аҕыс сылгыны тутан, Хатас сэлиэнньэтин бэйдиэ барбыт кыыллары быстах кэмҥэ тутар пууҥҥа илдьиллибиттэр. Сыл саҕаланыаҕыттан уопсайа 55 сылгы куорат иһиттэн үүрүллүбүт. Ону сэргэ, 16 сылгы тутуллан анал пууҥҥа хаайыллыбыт. Тыа хаһаайыстыбатын управлениетын салайааччыта Марат Данилов иһитиннэрбитинэн, бэйдиэ сылдьар сылгылары Хатастааҕы пууҥҥа тутуу ороскуота 182 тыһ солк. тиийбит.

«Тутуллубут аҕыс сылгы хаһаайыттара бэйдиэ сылдьар сылгыны көрүү-истии иһин прейскураҥҥа суруллубут сууманан ыстырааптаннылар. Билигин күһүн алтынньыга пууҥҥа аҕалыллыбыт сылгы турар. Хаһаайына кимэ биллэр», — диэтэ Марат Данилов.

Бэйдиэ сылдьар  сылгыны анал пууҥҥа тутуу прейскуранынан, кыһыҥҥы кэмҥэ алтынньы 11  күнүттэн ыам ыйын 14 күнүгэр диэри  биир сылгы көрүүтүгэр сууккаҕа төлөбүрэ 6960 солкуобай, сылгыны биир чаас көрүү 290 солк. тэҥнэһэр. Сайыҥҥы кэмҥэ, ыам ыйын 15 күнүттэн алтынньы 10 күнүгэр диэри биир сылгы көрүүтүгэр сууккаҕа төлөбүрэ 5808 солк. уонна сылгыны биир чаас көрүү 242  солк. тэҥнэһэр.

Бэлиэтээн суруйдахха, билигин хас даҕаны сылгы ДСК оройуонугар бэйдиэ сылдьаллар.