Бэйдиэ сылдьар кыылларга сыһыаннаах сокуон тосту уларыйыан сөп

Бэс ыйын 5 күнүгэр РФ Силиэстийэлиир кэмитиэтин бэрэссэдээтэлэ ВКС эрэсииминэн ыыппыт мунньаҕар Саха сиригэр бэйдиэ сылдьар кыыллар саба түһүүлэрин кытта сыһыаннаах холуобунай дьыалалары иккис төгүлүн дьүүллэстилэр. Бу туһунан РФ Силиэстийэлиир кэмитиэтин пресс-сулууспата суруйар.

Санаттахха, 2024 сыл алтынньытыгар РФ Силиэстийэлиир кэмитиэтин бэрэссэдээтэлигэр бэйдиэ сылдьар ыттар саба түһүүлэриттэн 12 саастаах кыыс өлбүтүнэн силиэстийэни тус хонтуруолугар туруорарга Саха сириттэн олохтоохтор көрдөһүүлээх тахсыбыттара. Ону таһынан Чульман бөһүөлэгин олохтоохторо оччолорго бэйдиэ сылдьар ыттар саба түһүүлэрин кыһалҕата өрөспүүбүлүкэ үрдүнэн сытыытык турарын туһунан биллэрбиттэрэ. Ону кытта бэйдиэ сылдьар кыыллары тутар тэрилтэлэр тустаах эбээһинэстэригэр дьалаҕайдык сыһыаннаһалларын эппиттэрэ. Оттон бу күҥҥэ сайабылыанньа биэрээччилэр бөһүөлэккэ уонна уопсайынан Саха сирин үрдүнэн балаһыанньа бигэтийбитин, Силиэстийэлиир кэмитиэт үлэһиттэригэр үгүс дьон кыһалҕаларын быһаарыыга сүҥкэн болҕомтону уонна көмөнү оҥороллоругар махтаннылар.

Силиэстийэлиир кэмитиэт Саха сиринээҕи салаатын салайааччыта В.В. Кондратенко кэккэ холуобунай дьыала силиэстийэлээһин хаамыытын билиһиннэрдэ. Холуобунай дьыала сорҕото суукка көрүллүбүт. Ону сэргэ нуормалыыр-быраап баазатын тупсарыыга кэлим үлэ бара турарын бэлиэтээтэ.

Мунньах түмүгэр РФ Силиэстийэлиир кэмитиэтин бэрэссэдээтэлэ Александр Бастрыкин бэйдиэ сылдьар кыылларга сыһыаннаах кыһалҕаны федеральнай таһымҥа сокуонунан быһаарыахха наадалааҕын эттэ. Кини бу саас РФ Силиэстийэлиир кэмитиэтигэр бэйдиэ сылдьар кыыллар ахсааныгар сыһыаннаах балаһыанньаны тосту уларытар кыахтаах сокуон этиилэрэ бэлэмнэммиттэрин санатта. Билигин сокуон барылын көҕүлээһиннэрэ дойду бырабыыталыстыбатыгар көрүллэр. Бу соруктар РФ Силиэстийэлиир кэмитиэтин бэрэссэдээтэлэ тус хонтуруолугар ылылынна.