Бэйдиэ сылдьар ыттар кыһалҕаларыгар сокуоҥҥа туох уларыйыы киириэй?

Өрөспүүбүлүкэҕэ бэйдиэ сылдьар ыттар кыһалҕалара сытыытык турар. Ол курдук бэҕэһээ, муус устар 25 күнүгэр, «Биир ньыгыл Арассыыйа» баартыйа уопсастыбаннай өйөбүлүн ыстаабыгар буолбут «төгүрүк остуолга» бэйдиэ сылдьар ыттар кыһалҕаларын туһунан кэпсэттилэр.

СӨ Бэтэринээрийэҕэ департаменын салайааччы Петр Петров «төгүрүк остуолга» кыттыыны ылла:

— Арассыыйа хас биирдии эрэгийиэнин килиимэтэ араас уратылаах. Ол курдук, бу уратылар бэйдиэ сылдьар ыттарга приюттары, питомниктары тутууга араас усулуобуйаны ирдииллэр. Холобур, биһиэхэ, Саха сиригэр тыйыс тымныыга маннык питомниктары тутуу хомунаалынай өттүнэн улахан ороскуоттаах буолар. Онон сокуон бырайыагар көрүллэр үбүлээһиҥҥэ маны учуоттууру уонна субъектар дуоһунастаах сирэйдэригэр бэйдиэ сылдьар ыттарга сыһыаннаах эрэгийиэҥҥэ сокуону ылыныы быраабын бэрдэрии буолар.

Эрэгийиэннэргэ быраабы биэрэр сокуону олохтооһун  хаһаайыннаах ыттары регистрациялааһын ирдэбилин өрөспүүбүлүкэ таһымыгар  күүһүрдэр соруктаах. Оччотугар хас биирдии хаһаайыннаах ыттары хонтуруоллуур кыах үөскүөҕэ. Ааспыт сыл түмүгүнэн, доруобуйа харыстабылын министиэристибэтэ иһитиннэрбитинэн, Саха сиригэр 1726 киһи ыкка ытыртарбыт. Быһаарыллыбытынан, бу ыттар улахан аҥаардара хаһаайыннаахтар. Бу сыл бастакы кыбаарталыгар ыкка ытыртарыы 93 түгэнэ бэлиэтэммит. Ыттар саба түһүүлэрин ахсаана ыстарааптар олохтонуохтарыттан арыый аччаабыт курдук, — диэн бэлиэтээтэ.

Бэтэринээрийэ департаменын салайааччы Петр Лукич өрөспүүбүлүкэҕэ 16 тыһыынчаттан тахса  ыт ыраастаммытын уонна аттаммытын иһитиннэрдэ. Ол эрээри, ыттаах хаһаайыттар  хонтуруолга ылыллыбаттарын, баҕалаахтар эрэ кэлэн ыттарын ыраастаталларын, аттаталларын бэлиэтээтэ. Ыттар сылга иккитэ төрүүллэр. Ол түмүгэр сыл ахсын 12-14 тыһыынча ыт оҕото төрүүр. Балары дьиэлэр подъезтарыгар эбэтэр даачаҕа сайын иитэ ылан баран күһүн бэйдиэ ыытар түгэннэр элбэхтэр. Бэйдиэ сылдьар ыт ахсаана аччаабат диэн иһитиннэрдэ Петр Петров.

Онон сокуон бырайыага дьон-сэргэ көмүскэллээх, ону сэргэ кыылга эппиэтинэстээх буолуутугар уонна сиэр-майгы өттүнэн үлэни күүһүрдүүгэ туһуланар.

Бэлиэтээн суруйдахха, ыам ыйын ортотугар Судаарыстыбаннай Дуумаҕа эрэгийиэннэр санааларын истэн, сокуоҥҥа бырайыактарын көрүөхтэрэ. Онон 498 №-дээх «Кыылга амарах сыһыан» туһунан Федеральнай сокуоҥҥа уларыйыы киирэрин дуу, киирбэтин дуу истиэхпит.