Бэйдиэ сылдьар ыттары туттулар

Саас буолан Дьокуускай куорат кытыы уулуссаларыгар, улуустарга ыттар үөрүнэн сылдьан дьоҥҥо-сэргэҕэ кутталынан суоһууллар.

Маннык сылдьар ыттар үксүлэрэ моойторуктаахтар. Ол эбэтэр хаһаайыннаах ыттар көҥүл-босхо баран бөҕү-саҕы ыһаллар, куорат устун айбардыыллар.

Муус устар 1-7 күннэригэр Дьокуускай куорат Автодорожнай уулуссатыгар уопсайа алта бэйдиэ сылдьар ыты туттулар. Сыл саҕаланыаҕыттан уопсайа 108  ыт тутуллан анал тутар сиргэ илдьиллибит. Мантан үгүстэрэ хаһаайыннаахтар.

СӨ Бэтэринээрийэ департаменын иниспиэктэрдэрэ рейдэлэргэ сылдьан сэрэтэр үлэлэри ыыталлар. Ол эрээри саас, күһүн хаһаайыттар ыттарын босхо ыытан кэбиһэн дьон эмсэҕэлээһиннээх иэдээннэр тахсаллар. Дьиэ кыылын иитиигэ быраабыланы кэһии иһин административнай эппиэтинсэкэ тардыллыахха сөп. Иитэ ылбыт кыылгыт-сүөлгүт иннигэр эппиэтинэһи сүгэргитин умнумаҥ!