Бэйдиэ сылдьар ыттары тутуу үлэтэ күүһүрүөҕэ

Бэйдиэ сылдьар ыттары тутуу үлэтин күүһүрдэр туһунан бүгүн, сэтинньи 7 күнүгэр, Дьокуускай куорат аҕа баһылыга Евгений Григорьев сорудахтаата.

Үлэни күүһүрдүүгэ быыһыыр сулууспа үлэһиттэрэ сыһыарыллыахтара. Ааспыт нэдиэлэҕэ уопсайа 21 бэйдиэ сылдьар ыты туппуттар. Бу туһунан Дьокуускай куорат дьаһалтатын телеграм-ханаала иһитиннэрэр.

— Бэйдиэ сылдьар ыттар аҥаардара — хаһаайыннаах ыттар. Үгүстэрэ моойторуктаах сылдьаллар. Маннык бэйдиэ сылдьар ыт хаһаайынын төлөбүрүнэн накаастыахпытын наада. Онуоха диэри балаһыанньа уларыйыа суоҕа. Холобура, куорат иһигэр бэйдиэ сылдьар аттар хаһаайыннарыгар ыстараап түһэриэхпититтэн, итинник сылдьар ат ахсаана биллэ аччаабыта. Онон бу хайысхаҕа куорат уокуруктарын кытта ыкса, күүстээх үлэ ыытыллыахтаах, — диэтэ куорат баһылыга Евгений Григорьев.

Бэлиэтээн суруйдахха, бэйдиэ ыттары тутууга бары уокуруктарга үс бэдэрээччит үлэлиир. Ону сэргэ, хаһаайыннаах ыттары бэйдиэ ыыппат туһугар сэрэтэр үлэ ыытыллар. Ол эрээри билиҥҥитэ эппиэтинэһэ суох хаһаайыттарга ханнык да ыстараап, миэрэ ситэ олохтоно илик.