Бэйэ дьыалалаах Эрика Сысоева саха косметикатын брендин оҥордо

Эрика Сысоева элбэх оҕолоох ийэ уонна бэйэ дьарыктаах урбаанньыт, «ErikaSalus» натуральнай косметика брендин төрүттээччи.

Кини урбааҥҥа айана сөбүлүүр дьарыгыттан саҕаламмыта, онтуката кэлин дьиҥнээх үлэтигэр кубулуйбута. Бородууксуйатыгар атыылаһааччылар ортолоругар үчүгэйдик биллэр эккэ-сииҥҥэ, илиигэ, баттахха туттуллар сириэстибэлэр киирэллэр.

“Бэрт кыра угууттан саҕалаабытым, бэйэм үппэр хас да бородууксуйаны оҥорбутум. Бастакы атыым бараатын кытта, барыһы урбааным сайдыытыгар укпутум», — диэн кэпсиир Эрика Сысоева.

Ароматерапия, доруобай аһылык уонна бэйэни көрүнүү туһунан билиитин туһанан, эккэ-сииҥҥэ, доруобуйаҕа болҕомтону уурар бородууксуйаны айан таһаарбыт.

Эрика Сысоева «Мин урбааным» Киин өйөбүлүн туһанан, бородууксуйатын хаатын оҥорууга көмө ылбыт. Кини бородууксуйата сделановякутии.рф. маркетплейска бааллар. Маны тэҥэ Эрика өссө блогун утумнаахтык ыытар, ол атыыта барарыгар улаханнык көмөлөһөр.

Бородууксуйалара «Бизнес-Экспо 2024» өрөспүүбүлүкэтээҕи быыстапкаҕа үрдүктүк сыаналанан, “Бастыҥ саҥа бородууксуйа» анал аат кыайыылааҕынан буолбута. Бүгүн кини урбаанын кэҥэтэр былааннаах уонна косметикатын атыылыыр саҥа пууннары бэлэмниир, диэн иһитиннэрэр Ил Дархан, бырабыыталыстыба пресс-сулууспата.