«Белиҥкэҕэ» төрүччүнү оҥорууну ырыттылар

В.Г. Белинскэй аатынан кыраайы үөрэтэр бибилэтиэкэҕэ төрүччүнү үөрэтиигэ кэккэ тэрээһин тиһигин быспакка ыытыллар.

Бу туһунан бибилэтиэкэр Екатерина Попова маннык сырдатта:

— Төрүччүнү үөрэтиинэн үгүс киһи дьарыктанар буолан, бу тиэмэни кэрэхсиир киһи үгүс.

Ол да иһин буолуо, бэҕэһээ, сэтинньи 20 күнүнээҕи тэрээһиммитигэр, саалабытыгар кэлбит дьон баппакка, ахсынньыга эмиэ былааннаатыбыт.

Маннык тэрээһиннэри нэһилиэнньэ ирдэбилинэн кэмиттэн кэмигэр ыытабыт.

Архыып үлэһитэ Екатерина Сергеенко анаан кэлэн, түмсүбүт дьоҥҥо төрүччүну ханна, хайдах көрдүөххэ наадатын сиһилии кэпсээтэ, элбэҕи быһаарда.

Үгүс дьон анал  исписэлиистэн төрүччүнү оҥорууну туохтан саҕалыахха сөбүн, архыыпка хайдах үлэлиири, туоһулуур докумуону кытта хайдах үлэлиири, сыылынайдар, репрессияҕа түбэспит дьон, дьаамсыктар тустарынан ханна хайдах көрдүөххэ сөбүн ыйыттылар.

Бибилэтиэкэ үлэһиттэрэ бу тэрээһиҥҥэ эрдэттэн бэлэмнэнэн, улуустар тустарынан кинигэлэртэн бэйэлэрин дьоннорун, аҕа уонна ийэ уустарын төрүччүлэрин туһунан бэлэм матырыйааллары бэлэмнээбиппитин, үгүстэр сурунан, хаартыскаҕа түһэрэн, видеоҕа устан ылан, бэрт элбэх билиини ылан, истиҥ махталларын тиэртилэр.

… Ити курдук, бибилэтиэкэ үлэһиттэрэ олус туһалаах уонна наадалаах тэрээһиннэри тэрийэр буолан, ааҕааччылар “Белиҥкэ” ыытар тэрээһиннэрин анаан кэтэһэн сылдьаллар. Саала иһигэр баппат киһи мустуута – ол туоһута.