Бэлисипиэти уоран тутулунна

Намҥа ИДьМ отделын дьуһуурунай чааһыгар биир дьахтар дьиэлэрин таһыттан 12  тыһ.солк. суумалаах бэлисипиэт сүппүтүн туһунан үҥсүбүт.

Суһал-ирдиир үлэ түмүгүнэн, полиция үлэһиттэрэ урут сууттана сылдьыбыт 42 саастаах киһи буоларын быһаарбыттар.

Ол курдук, түүн бу киһи табаарыстарыгар баран иһэн, биир дьиэ таһыгар бэлисипиэт өйөнөн турарын көрбүт уонна уоран ылбыт. Кини табаарыстарыгар тиийэн арыгы иһэ охсор санааттан түргэнник тиийээри ылбытым диэн ону эппит. Биллэн турар, бэлисипиэти тиийбит сиригэр хаалларбыт.

ИДьМ пресс-сулууспата иһитиннэрбитинэн, РФ Холуобунай кодексатын 158 ыст. 2 ч. «Уоруу» диэнинэн холуобунай дьыала тэриллибит.

СӨ ИДьМ пресс-сулууспата