Салгыы
Бэлисипиэтинэн айаннааччылар Бүлүү Хампатыгар кэллилэр (видео)

Бэлисипиэтинэн айаннааччылар Бүлүү Хампатыгар кэллилэр (видео)

11.07.2024, 19:14
Хаартыска уонна видео -- ВелОСА телеграм-ханаалтан
Бөлөххө киир:

Бу күннэргэ  Мииринэйгэ  бэлисипиэтинэн баран иһэр айанньыттар Бүлүү улууһун нэһилиэктэринэн ааһан эрэллэр.

Айанньыттар бэлиэтииллэринэн, суолга кинилэргэ болҕомтолорун ууран ааһар киһи үгүс. Ордук ыарахан уйуктаах массыыналар суоппардара харыстабыллаахтык сыһыанналлар эбит.

Ол курдук, Илбэҥэ суолун диэки Ньурбаттан иһэр «Соболь» массыына суоппардара уу уонна сакалаат бэрсэн ааспыттар.

“Үөрүүбүтүттэн ааттарын да ыйыппакка хааллыбыт», — дэһэллэр Ангелина Петрова уонна Ольга Семенова. Аара эбиэттэригэр гречка буһарынан үссэммиттэр.

Мииринэйтэн иһэр кэргэнниилэр эмиэ айхаллаан ааспыттар.

Аара баран иһэн айанньыттар киҥинэйэн да ыллыыллар,

Ол быыһыгар сынньана олорон, хоһоон да айа охсон ылаллар:

Эмиэ тимир аппытын миинэн,

Айан киэҥ аартыгар туруннубут.

Үс сыл бодоруспут дьүөгэлэр

Биир санааны ыра оностон

Баҕа санааны батыһа,

Кыһыны быһа былааннаан,

Барыллаан бэркэ бэлэмнэнэн,

Алгыстаах суолбут аартыгын

Арчылыыбыт айаммыт устун.

Тулабыт эргиччи күөх айылҕа.

Арыаллыыллар биһигини тыал,

Тииттээх сис, бэс чагда,

Хатыҥнардаах чараҥ уонна үөн-көйүүр арааһа.

Уһун субуллар күөллэр,

Үрүйэлэр уруйдууллар,

Үрэхтэр үөрэллэр.

Айанныыбыт биһиги

Кырылас кумахтаах

Оҥоһуулаах таас айан суолунан

Үгүс үрдэллэри дабайабыт,

Сыырдары сирилээн түһэбит.

Аастыбыт аламаҕай дьонноох,

Горнай улууһун,

Эйэҕэс-сайаҕас Бүлүү сирин буллубут.

Уубут бүтэн, аара Дьөппөҥҥө кэлэн былырыын тохтоон ааспыт маҕаһыыммытыгар киирэ сырыттыбыт. Биһигини былырыыҥҥы атыыһыттар үөрэ-көрүстүлэр. Эмиэ 2023 сыллаахха олорон ааспыт олоппосторбутугар олорон сынньанан ыллыбыт. Дьөппөн маҕаһыынын атыыһыттара биһиэхэ айаҥҥа олус туһалаах бырдах эмин бэлэхтээтилэр, — диэн кэпсиир Ангелина Петрова.

«Биир эдэр киһи биһигини эккирэтэн кэлэн, алаадьы биэрэн ааста уонна этэҥҥэ айанныырбытыгар баҕарда. Киниэхэ «махтал эйиэхэ, күндү биир дойдулаахпыт, саха киһитэ!” дии хааллыбыт» — диир Ольга Семенова.

Айанньыттар бу киэһэ Хампаҕа кэллилэр. Манна хонон баран, салгыы айанныахтара.

+1
1
+1
0
+1
0
+1
0
+1
0
+1
0
+1
0
Бары сонуннар
Салгыы
14 июля
  • 19°C
  • Ощущается: 19°Влажность: 77% Скорость ветра: 1 м/с

Сообщить об опечатке

Текст, который будет отправлен нашим редакторам: