Бэлисипиэтинэн күрэхтэһии Кыайыы күнүгэр ананар

Ыам ыйын 10  күнүгэр Покровскай — Дьокуускай суолугар сыллата ыытыллар «Лосиные бега» бэлисипиэтинэн күрэхтэһии ыытыллар. Быйылгы күөн күрэс Аҕа дойду уоттаах сэриитигэр Улуу Кыайыы 79 сылыгар ананар.

Күрэхтэһии Покровскайга «Успуорт дыбарыаһыттан» саҕаланар. Спортсменнар куоталаһыыларын Владимировкаҕа кэлэн түмүктүөхтээхтэр. Суолларын уһуна  56 км.

Күрэхтэһиигэ кыттыахтарын баҕалаахтар бэлисипиэттэрин көрүммүт, шлемнаах уонна спортивнай таҥастаах буолуохтаахтар. Холонон көрөргө санаммыттар orgeo.ru киирэн регистрацияланаллар. Сайаапкалары ыам ыйын 9 күнүгэр диэри ылаллар.

Күрэхтэһиигэ саастарынан уонна бэлисипиэттэринэн көрөн арахсаллар. Сэҥээрбиттэр, сэргээбиттэр сиһилии https://www.sakha.gov.ru/news/front/view/id/3397969  көрүөхтэрин сөп.

Кыайыылаахтарга уонна призердарга өйдөбүнньүк мэтээллэр, грамоталар уонна бириистэр туттарыллаллар.

Күрэхтэһии бырагыраамата:

Ыам ыйын 10 күнэ
11:00 – күрэхтэһээччилэр түмсэллэр, регистрацияланаллар;
11:45 – ыйыы-кэрдии, сүбэ-ама;
12:00 – күрэхтэһии саҕаланыыта;
15:30 – түмүгү таһаарыы;
16:00 – наҕараадалааһын.

СӨ Ил Дарханын уонна СӨ Бырабыыталыстыбатын пресс-сулууспата