Бэлисипиэттээх, самокаттаах оҕолору массыыналар түҥнэри көппүттэр

Ааспыт сууккаҕа Дьокуускайга алта суол саахала бэлиэтэммит, оҕолор эчэйбиттэрин туһунан киин куораттааҕы ГАИ иһитиннэрэр.

Ыам ыйын 20 күнүгэр 18 чаас саҕана Чернышевскай уонна Дежнев уулуссалар быһа охсуһууларыгар бэлисипиэттээх оҕону түҥнэри көппүттэр. Барыллаан быһаарбыттарынан, «Тойота Виста» массыына 22 саастаах суоппара Кулаковскай уулуссатыттан Дежнев уулуссатын диэки салайаары, пешеходунан ыксаабакка туораан испит бэлисипиэттээх 13 саастаах оҕону түҥнэри көппүт. Оҕо кыра эчэйиилэри ылбыт.

Балыыһаҕа суол саахалыгар эмсэҕэлээбит сааһын ситэ илик оҕо кэлбит. Бэрэбиэркэ быһаарбытынан, «Тойота Премио» массыына 38 саастаах суоппара Ленин проспегын уонна Кулаковскай уулусса быһа охсуһууларыгар 9 саастаах оҕону түҥнэри көппүт. Оҕо самокатынан сылдьыбыт, сиһин эчэппит.