Бэлитиичэскэй диэйэтэл А.П. Илларионовы ахтан-санаан аастылар

Бу күннэргэ өр сылларга СӨ бастакы ыҥырыылаах Ил Түмэнин бэрэстэбиитэллэрин Палаататын бэрэссэдээтэлэ, СӨ үтүөлээх юриһа, тылбаасчыт, бэйиэт Афанасий Петрович Илларионов 80 сааһын бэлиэтиир тэрээһиннэр буола тураллар.

Ааспыт өрөбүллэргэ норуот дьокутааттара Саха Өрөспүүбүлүкэтин судаарыстыбаннай, общественнай уонна бэлитиичэскэй диэйэтэл Афанасий Илларионовка анаммыт тэрээһиҥҥэ кытыннылар. Тэрээһин Чурапчы улууһун Туора Күөлүгэр ыытыллынна.

Үөрүүлээх тэрээһин А.П.Илларионова пааматынньыгар сибэкки дьөрбөтүн уурууттан саҕаланна. Бу күн Афанасий Петрович кэргэнэ Венера Егоровна, аймахтара, чугас доҕотторо кыттыылы ыллылар.
Афанасий Илларионовка аналлаах тэрээһиҥҥэ Ил Түмэн спикерэ Алексей Еремеев СӨ Судаарыстыбаннай Мунньаҕын уонна тус бэйэтин аатыттын мустубут дьону эҕэрдэлээтэ уонна сүдү киһи Саха сирэ сайдарыгар үтүө өҥөлөөҕүн, өрөспүүбүлүкэ бүттүүнэ киэн туттарын тоһоҕолоон эттэ.
«Афанасий Петрович наһаа уйан дууһалаах киһи этэ, кини олус үчүгэйдик быһааран кэпсиир дьоҕурдааҕа, ылыннарыылаах тыллааҕа. Билиҥҥэ диэри мин кинини кытары тугу кэпсэппиппитин, дьүүллэспиппитин бу баардыы өйдүүбүн», — диэн Алексей Еремеев бэлиэтээтэ.

Итини сэргэ норуот дьокутааттатара Михаил Гуляев уонна Павел Пинигин, тыа хаһаайыстыбатын министрэ Александр Атласов үтүө киһи туһунан тыл этэн, ахтан-санаан аастылар.
Өйдөбүнньүк тэрээһин олус истиҥник ааста.
Санатан этэр буоллахха, А.П. Илларионов дьокутаат, бэлитиичэскэй диэйэтэл эрэ буолбакка, нууччалыыттан сахалыы тылбаас маастарын быһыытынан эмиэ биллэр. Кини Сергей Есенин «Персидские мотивы», «Слово о полку Игореве» уонна Расул Гамзатов сонеттарын тылбаастаан дьон сэҥээриитин, биһирэбилин ылбыта.

Хаартыскалар Ил Түмэн саайтыттан.