Бөлүһүөк, муусукаан Михаил Тумусов олохтон туораата

Олунньу 26 күнүгэр Үөһээ Бүлүү улууһун уонна Кэнтик нэһилиэгин Бочуоттаах олохтооҕо, өрөспүүбүлүкэҕэ биллэр норуот бөлүһүөгэ, «Гражданскай килбиэн» бэлиэ хаһаайына, саха рок хамсааһынын төрүттэччи, муусукаан, саха төрүт билиитин үөрэҕин элбэх кинигэ ааптара, саха «ВИА» бөлөх сайдыыларыгар, сахалыы доҕуһуолга олорууларыгар сүҥкэн кылааты киллэрбит Михаил Сысоевич Тумусов, норуокка биллэринэн Тумус Мэхээлэ, ыарахан ыарыыга ылларан, күн сириттэн олохтон туораата.

«Кини «Чороон», «Чолбон», «Айтал», «Дапсы» рок бөлөхтөр тэриллэллэригэр, сайдыыларыгар улахан сабыдыаллаах. Маны таһынан, Михаил Тумусов суруйбут, чочуйбут хоһоннорунан саха эстрадатын чаҕылхай артыыстара ырыа ыллыыллар. Саха академическай тыйаатырыгар «Ойуун түүлэ» испэктээги туруорууга үлэлэспитэ. «Табык» рок бэстибээли 1989 сыллаахха төрүттээбит, иилээбит-саҕалаабыт умнуллубат улахан өҥөлөөх.

Тумус Мэхээлэ «Чап» уустарыттан удьуордаах, саха сиэрин, култууратын өрө туппут, бигэ сахалыы көрүүлээх, истиилээх ураты дьоҕурдаах киһибит биһиги кэккэбититтэн суох буолбута саха норуотугар улахан сүтэрии буолар. Кэлиҥҥи кэмҥэ, аҕыйах сыл иһигэр саха төрүт билиитин-үөрэҕин сурукка хаалларарга дьаныардаахтык үлэлээбитэ, элбэх кинигэни таһаарбыта.

Үөһээ Бүлүү улууһун дьаһалтатын уонна тус бэйэм аппыттан Михаил Сысоевич чугас дьонугар, аймахтарыгар дириҥ кутурҕаммын тиэрдэбин. Кини сырдык аата, чаҕылхай үлэлэрэ, хаалларбыт суола үйэлэри уҥуордаан өрүү тыыннаах буолуоҕа. Быдан дьылларга быраһаай», — диэн Үөһээ Бүлүү улууһун баһылыга Валерий Николаев ТГ-ханаалга биллэрдэ.