Бэрдьигэстээх дьаһалтата үлэ киһитигэр дьиэ тутарга быһаарда

Горнай улууһун Бэрдьигэстээх нэһилиэгин дьаһалтатын  көҕүлээһининэн Үлэ сылын чэрчитинэн биир үтүө бачыым олоххо киирэр буолла.

Бу туһунан Бэрдьигэстээх сэлиэнньэтин баһылыгын солбуйааччы Ксенья Васильева  бу курдук кэпсээтэ:

— Баһылыкпыт Алексей Аргунов дьаһалта, үөрэх управлениетын исписэлиистэрин, улуустааҕы «Үлэ күүhэ» хаһыат, бэтэрээннэр, ыччаттар сэбиэттэрин, кулууп салайааччыларын мунньан сүбэ мунньах ыытта. Кэпсэтии өрөспүүбүүлүкэҕэ киэҥник биллэр рационализатор, «ретро» массыыналар мусуойдарын төрүттээбит  Захар Павлов дьиэтэ наһаа эргэрэн, ытык киһибитигэр саҥа дьиэ тутан биэрэргэ былааннааһын тула барда. Үлэ сылыгар үтүөкэннээх үлэһит киһи 75 сааһын туолар. Кэргэнэ Любовь Петровна үйэтин тухары оҕо саадын сэбиэдиссэйинэн үлэлээбитэ. Онон Уһуйааччы уонна учуутал сылыгар эмиэ түбэһиннэрдибит.  Норуот күүһүнэн 7х8  кв м иэннээх мас дьиэни тутан биэргэ быһаардыбыт. Нэһилиэнньэттэн туөлбэлэринэн харчы хомуйуохпут. Урбаанньыттартан, меценаттартан спонсордары булуохпут. Онон бу үлэни сүрүннүүр анал хамыыһыйа тэрийдибит, былаан оҥоһуннубут, смета торумнаатыбыт. 

… Ити курдук, Үлэ сылыгар Горнай Бэрдьигэстээҕин дьаһалтата сэлиэнньэ киэн туттар киһитигэр өрөспүүбүлүкэҕэ бэртээхэй бачыымы торумнаан,  үтүө дьыаланы саҕалаата, бастыҥ холобуру көрдөрдө.