Бэрдьигэстээх эр дьоно «Чыпчаал» стадион хаарын ыраастаатылар

Бу күннэргэ Саха сирин киин улуустарыгар   халыҥ хаар түһэн, үгүс тэрилтэҕэ субуотунньугунан эрэ кыайар үлэ таҕыста.

Горнай улууһун Бэрдьигэстээҕэр баччаларга өрүү хаар түһэр буолан, эр дьон субуотунньуга үгэскэ кубулуйда.  Сэлиэнньэ сааскы улахан тэрээһиннэрэ «Чыпчаал» стадиоҥҥа ааһар буолан,  манна субуотунньук сыл аайы ыытыллар.  Бэҕэһээ, муус устар 10 күнүгэр, Бэрдьигэстээх 200-чэкэ эр дьоно мустан, кыһыны быһа түспүт, эбиитин бу күннэргэ түспүт хойуу хаары  биир сүбэнэн күрдьэн кэбистилэр.

Стадион  хаара уһун кыһыны быһа сытан,  дьиппинийэн кытааппытын, эр бэртэрэ  тулуппакка, тоҥ хаары тоҕута сынньан сүүрэр былаһаакканы  ыраастаатылар. Субуотунньук кыттыылаахтарыгар олохтоох дьаһалта салалтата уонна Бэрдьигэстээх дьоно-сэргэтэ  барҕа махталларын тиэртилэр.