Бэрдьигэстээх түөлбэлэрин холобурдара — бастыҥ

Горнай улууһун Бэрдьигэстээҕэр «Чэбдик» уонна «Сэргэлээх» түөлбэлэр икки ардыларынан «Кимикий» диэн ааттаах үрэх устар.

Бу кыракый үрэх-үрүйэ сааскы хаар уулларын саҕана сыл аайы уута олус элбиир, кэҥиир. «Чэбдик» түөлбэттэн бу сиринэн сылдьар дьон кыракый далаһа устун туорууллара.

Ол, биллэн турар, кырдьаҕас дьоҥҥо үгүс уустуктары үөскэтэрэ. Былырыын олохтоох дьаһалта ыыппыт тупсарыы күрэҕэр Сэмэн Данилов аатынан оскуола учуутала Марианна Николаева бырайыага кыайыылаах тахсыбыта. Бу күннэргэ оскуола кэлэктиибэ көмөлөөн, бырайыагы олоххо киллэрдилэр.

Киэҥ, бөҕө муоста тутулунна, олохтоохторго олус туһалаах бэлэҕинэн буолла. Бу туһунан сэлиэнньэ дьаһалтатын пресс-киинэ иһитиннэрдэ.

Ити курдук, Бэрдьигэстээх түөлбэлэрэ кыайыах дьыаланы улаатыннарбакка, салалта илиитин-атаҕын манаабакка, бэйэлэрин олохторун чэпчэтэргэ дьулуһуулара — атын улуустар нэһилиэктэригэр бастыҥ холобур.