Бэрдьигэстээххэ 49 ыал саҥа дьиэ күлүүһүн туттулар

Бэҕэһээ, от ыйын 14 күнүгэр, Горнай улууһун  Бэрдьигэстээҕэр МСО түөлбэҕэ  Парфенов уулусса 31А уонна 29А  дьиэлэр  олохтоохторугар саҥа кыбартыыра күлүүстэрин туттардылар диэн улуус дьаһалтатын пресс-сулууспата иһитиннэрдэ.

Бу дьиэлэр “Хаарбах туруктаах дьиэлэртэн көһөрүү” бырагырааманан тутуллан үлэҕэ киирдилэр.

Саҥа дьиэҕэ киирбит ыаллары бу үөрүүлээх уонна күүтүүлээх бэлиэ түгэнинэн  улуус баһылыгын бастакы солбуйааччы Алгыс  Стручков, Бэрдьигэстээх нэһилиэгин баһылыга Алексей Аргунов эҕэрдэлээтилэр  уонна саҥа  кыбартыыралары кэрийэн көрдүлэр, билистилэр.

Саҥа дьиэ хаһаайыттарыгар үтүө тыллары этэн, тэрилтэ кыра ис-тас үлэтин ыытарга, кыбартыыраларга баар итэҕэстэри көннөрөргө эрэннэрдилэр диэн Горнай улууһун дьаһалтатын пресс-сулууспата иһитиннэрдэ.