Бэрдьигэстээххэ «Бүлүү» федеральнай суолугар киириигэ светофор туруораллар

Бу күннэргэ Горнай улууһун Бэрдьигэстээх сэлиэнньэтигэр С.Дьячковскай уонна “Бүлүү” федеральнай суол быһа охсуһууларыгар светофордары туруоран эрэллэр.

«Бу суоллар быһа охсуһууларыгар, суоппардарга ааһар массыыналары көрөллөрүгэр, ордук кыһыҥҥы кэмҥэ эрэйдээх буолааччы. Мантан сылтаан суол быһылааннара да тахсыбыт түгэннэрэ үгүс. Олохтоохтор хас да сыллаах туруорсууларын олоххо киллэрэн, «Бүлүү»  федеральнай суол управлениетын  сакааһынан бу үлэ бара турар», — диэн суруйар «Маатта сонуннара» телеграм-ханаал пресс-сулууспата.