Бэрдьигэстээххэ «Сардаҥа» ТОС үбүлүөйдээх сылын бэлиэтээтэ

Быйыл Бэрдьигэстээх нэһилиэгин «Сардаҥа» ТОС үбүлүөйдээх 25 сылын бэлиэтээтэ. Бу дьоро күнүнэн Бэрдьигэстээххэ «Үйэлэргэ сандаара тур» бэстибээл ыытылынна.

Тэрээһиҥҥэ улуустартан, олохтоох салалтаттан бэрэстэбиитэллэр кытыннылар. Бочуоттаах ыалдьыттарынан Москваттан «Добрые соседи» бырайыак салайааччыта, ТОС университетын дириэктэрин солбуйааччы, политэхиньиичэскэй наука хандьыдаата Сергей Александрович Кузнецов уонна СӨ ыччат дьыалатын уонна социальнай алтыһыытын миниистирин солбуйааччы Андрей Александрович Сосновскай буоллулар. Покровскайтан, Чурапчыттан, Амматтан, Тааттаттан, Анаабыртан, Горнай улууһун нэһилиэктэриттэн кэлэн кыттыыны ыллылар.

Тэрээһин сарсыарда  «Сардаҥа» ТОС спортивнай былаһааккатыттан саҕаланна. Түһүлгэҕэ чэбдигирдэр хамсаныылары ыччат бэлиитикэтигэр, култуураҕа уонна успуорка Ааҕыныстыба спортинструктора София Обутова оҥоттордо. Манна хаалыктаах хаамыыны биһирээччилэр уонна оскуола үөрэнээччилэрэ көхтөөхтүк кытыннылар.

М.С.Егоров аатынан сынньалаҥ кинигэр хаартыскаҕа түһэр сир тэрилиннэ, «Лучшие моменты за четверть века» хаартысканан экспозиция,кофе-брейк уо.д.а. тэрилиннэ. «Забор пожеланий» ким баҕарар баҕа санаатын суруйда.

Тэрээһиҥҥэ мустубут ыалдьыттары нэһилиэк баһылыга Алексей Аргунов, улуус дьокутааттарын сэбиэтин бэрэссэдээтэлэ Маргарита Константинова, бочуоттаах ыалдьыттар Сергей Кузнецов, Андрей Сосновскай, Саха сирин ТОС Ассоциациятын бэрэссэдээтэлэ Ксения Васильева уо.д.а. эҕэрдэлээтилэр.

Тэрээһин иккис чааһа Семен уонна Софрон Даниловтар ааттарынан духуобунай киинигэр буолла. Манна сэминээр, Бэрдьгэстээх ТОС «Творим, создаем, вдохновляем» дьаарбаҥката, оҥоһуктары атыылааһын уо.д.а. дьону-сэргэни түмтэ. Салгыы ТОС үлэтигэр бастыҥ быраактыкалары билиһиннэрии буолла. Саҕаланыытыгар ыччат миниистирин солбуйааччы Андрей Сосновскай  «О механизмах развития ТОС в Якутии» тиэмэҕэ дакылаатын иһиттилэр. Ол кэнниттэн «Лучшая практика ТОС»Бүтүн Арассыыйатааҕы күөн күрэс кыайыылаахтара үлэлэрин туһунан сырдаттылар. ТОС «Алаас» Амматтан Петр Табунанов, ТОС «Сардаҥа» Горнайтан Любовь Мордовская, ТОС «Теплица» Тааттаттан Диана Соломонова, ТОС «Айтал» Горнайтан Жоржетта Текеянова, ТОС Эбэ» Горнайтан Вероника Сергеева сырдатыыларын сэргээн иһиттилэр.

Мустубут ыалдьыттарга туһаайан Москваттан кэлбит ыалдьыт, «Добрососедство в ТОСах — драйвер развития муниципалитетов» бырайыак ааптара Сергей Кузнецов ТОС үлэтин-хамнаһын туһунан кэпсээтэ.

Түмүккэ Бэрдьигэстээххэ искибиэрдэринэн экскурсия тэрилиннэ. Манна даҕатан эттэххэ, олохтоохтор мини-искибиэр тэрийэннэр дьоҥҥо-сэргэҕэ үөрүүнү бэлэхтиир үгэстээхтэр.

Хаартыскалар Бэрдьигэстээх дьаһалтатыттан